చిన్నారులతో కాళ్లు కడిగించుకున్న వైసీపీ ఎమ్మెల్యే

ఏపీ ప్రభుత్వం చేపట్టిన 'గడప గడపకు..' కార్యక్రమంలో ఓ ఎమ్మెల్యే చిన్నారులు, మహిళల చేత కాళ్లు కడిగించుకోవడం తీవ్ర విమర్శలకు దారి తీసింది. తూర్పుగోదావరి జిల్లా అనపర్తి ఎమ్మెల్యే డాక్టర్ సత్తి సూర్యనారాయణ రెడ్డికి పాదపూజ పేరుతో.. కొందరు ఆయన కాళ్లను చేతులతో కడిగి, వస్త్రంతో తుడిచారు. పెదపూడి మండలం రామేశ్వరంలో గత నెల 30న ఈ ఘటన జరగగా ఆలస్యంగా వెలుగులోకి వచ్చింది. పెద్దమూడి మండలంలో నిర్వహించిన గడపగడపకు మన ప్రభుత్వం కార్యక్రమంలో ఈ తంతు జరిగింది.

చిన్నారులు కాళ్లు కడుగుతుంటే ఎమ్మెల్యే అభ్యంతరం చెప్పకపోగా.. చక్కగా కడిగించుకోవడం ఇప్పుడు విమర్శలు వెల్లువెత్తుతున్నాయి. ఈ ఘటన వెలుగులోకి రావడంతో పెదపూడి మండల మహిళా సమాఖ్య అధ్యక్షురాలు బి విజయ కుమారి సమర్థించుకున్నారు. ఈమేరకు వివరణ ఇస్తూ ఓ వీడియోను కూడా విడుదల చేశారు. ఆ వీడియోలో మహిళలు, చిన్నారులు తమ ఇష్టాపూర్వకంగానే ఎమ్మెల్యే కాలు కడిగారని.. ‘అమ్మ ఒడి’ పథకంలో భాగంగా తమ ఖాతాలకు నగదు జమైందని.. దీంతో వారు తమ మనమరాలని ఎమ్మెల్యే కాళ్లు కడిగి సన్మానం చేద్దామని కోరడంతో చిన్నారులు కూడా ఒప్పుకున్నారని తెలిపారు. మహిళలు, చిన్నారులు కోరుకోవడంతోనే ఎమ్మెల్యే తన ఇంటికి వచ్చినప్పుడు ఇలా కాళ్లు కడిగామని సమర్థించుకున్నారు. దీని కొందరు రాజకీయం చేస్తున్నారని… అది సరికాదని తెలిపారు. దీనిమీద ప్రతిపక్ష పార్టీ అయిన టిడిపి మండిపడుతోంది. చిన్నపిల్లలతో కాళ్లు కడిగించుకోవడం చూస్తుంటే మనం రాతియుగంలో ఉన్నామా.. ఆధునిక యుగంలో ఉన్నామో అర్థం కావట్లేదని టిడిపి రాష్ట్ర ఉపాధ్యక్షుడు నల్లమిల్లి రామకృష్ణారెడ్డి విమర్శలు గుప్పించారు.