ఆంజనేయుడికి ఒక సీటు..ఆదిపురుష్ ఐడియా అదుర్స్

భారతీయ సినీ ఇండస్ట్రీలో మాత్రమే కాదు...ప్రస్తుతం ప్రపంచవ్యాప్తంగా ఎక్కువగా వినిపిస్తున్నపేరు ఆదిపురుష్. ఈ సినిమా విడుదల కోసం పాన్ ఇండియన్ సూపర్ స్టార్ ప్రభాస్ ఫ్యాన్స్ వేయి కళ్లతో ఎదురుచూస్తున్నారు. ప్రభాస్ క్రేజ్‎కు తగ్గట్లుగా దర్శకుడు ఓం రౌత్ వందల కోట్ల బడ్జెట్‎తో ఆదిపురుష్ సినిమాను రూపొందించారు. రామాయణం ఇతిహాసం నేపథ్యంలో వస్తున్న ఈ సినిమాలో ప్రభాస్ రాముడిగా కనిపించనున్నాడు. హిందీలో తొలిసారిగా ప్రభాస్ ఆదిపురుష్ తో ఎంట్రీ ఇవ్వబోతున్నాడు. ఈ సినిమా జూన్ 16న వరల్డ్ వైడ్‎గా సినిమా విడుదల కాబోతోంది. దీంతో ఆదిపురుష్ టీం ఓ రేంజ్‎లో ప్రమోషన్స్ చేస్తోంది. ఇప్పటికే విడుదలైన ట్రైలర్స్, సాంగ్స్‎కి వస్తున్న బజ్ చూస్తూ బాక్స్ ఆఫీస్ వద్ద హిట్టు పక్కా అన్న టాక్ భారీగా వినిపిస్తోంది. తిరుపతిలో జరిగే ప్రీ రిలీజ్‎ను కూడా కనీవినీ ఎరుగని రీతిలో నిర్వహించేందుకు అన్ని రకాల ఏర్పాట్లు చేసింది ఆదిపురుష్ టీమ్.

ఇదిలా ఉంటే ఇవన్నీ ఒకఎత్తైతే...లేటెస్టుగా ఆదిపురుష్ మేకర్స్ మరో థ్రిల్లింగ్ కాన్సెప్ట్‎తో ముందుకు వచ్చి ప్రభాస్ ఫ్యాన్స్‎ను ఫిదా చేశారు. ఆంజనేయ స్వామి అంటే అందరికి ఎంతో నమ్మకం అది స్పెషల్‎గా చెప్పాల్సిన అవసరం లేదు. ఏ పనిలో అయినా భయం అనేది దరి చేరకుండా ధైర్యంగా ముందుకు వెళ్లాలనుకునే వారు ఏ పని చేయడానికి అయినా.. యుందుగా ఆంజనేయ శ్లోకం చదువుతుంటారు. ఆ నమ్మకంతోనే సినిమా విజవంతం కావాలని ఆదిపురుష్ టీమ్ ప్రపంచవ్యాప్తంగా సినిమా ప్రదర్శించి ప్రతి థియేటర్‏లో ఒక సీట్‎ను హనుమంతునికి కేటాయిస్తున్నామని మేకర్స్ అనౌన్స్ చేశారు. సినీ హిస్టరీలో ఎప్పుడు జరుగని విధంగా ఈ అద్భుతమైన కార్యక్రమానికి శ్రీకారం చుట్టామన్నారు మేకర్స్. ఎంతో ప్రతిష్టాత్మకంగా అత్యంత భారీ హంగులతో నిర్మించిన ఆదిపురుష్ ని హనుమంతుడి సమక్షంలో అందరం తప్పక చూద్దాం అంటూ తెలిపారు.

నిజానికి రామాయణ పారాయణం జరిగే ప్రతిచోటకి హనుమంతుడు వస్తాడు అనేది హిందువుల నమ్మకం. ఆ నమ్మకాన్ని గౌరవిస్తూనే ఆదిపురుష్ టీమ్ ఈ నిర్ణయం తీసుకుంది. ఆదిపురుష్ సినిమాని ప్రదర్శించే ప్రతి సినిమా హాల్‎లో థియేటర్లో ఒక సీటును విక్రయించకుండా ఆంజనేయుని కోసం ప్రత్యేకంగా కేటాయిస్తున్నారు. ఈ నిర్మాణ సంస్థ తీసుకున్న సరికొత్త నిర్ణయం అందరిని ఆకట్టుకుంటోంది. అభిమానుల గుండెలను భక్తి భావంతో నింపేశారు మేకర్స్. మూవీరిలీజ్, థియేటర్స్ గురించిన వివరాలకు సంబంధించి మేకర్స్ అధికారికంగా ఓ లెటర్ ని షేర్ చేశారు. ఇప్పుడు ఆ లెటర్ భారతీయ సినీ ఇండస్ట్రీలో హాట్ టాపిక్‎గా మారింది. దీంతో ఈ విషయం నెట్టింట్లో వైరల్‎గా మారింది. ప్రతి థియేటర్లోను హనుమంతుడికి సీటు అంటూ తమకు తెలియకుండానే ప్రభాస్ ఫ్యాన్స్ ప్రమోషన్స్ కూడా చేస్తున్నారు.