National Best Actor: అల్లు అర్జున్.. అవమానాల నుంచి ‘జాతీయ’ అద్భుతం వరకు..
టాలీవుడ్‌ అగ్రనటుల్లో అల్లు అర్జున్ ఒకరు. ప్రముఖ నిర్మాత అల్లు అరవింద్ కొడుకు, హాస్య నటుడు పద్మశ్రీ అల్లు రామలింగయ్య మనవడు, మెగస్టార్ చిరంజీవి అల్లుడిగా సినీ పరిశ్రమలో అడుగుపెట్టిన బన్నీ..తనకంటూ ఓ గుర్తింపు తెచ్చుకున్నాడు. పెద్ద బ్యాంగ్రౌండ్‌తోనే వచ్చినా సొంత టాలెంట్‌తో ప్యాన్ ఇండియా స్టార్‌గా ఎదిగాడు. గంగోత్రి సినిమాతో హీరోగా తెలుగువారికి పరిచయమైన అల్లు వారి అబ్బాయి ఏళ్ల సినీ కెరీర్‌లో ఎన్నో ఎత్తుపల్లాలు చూశాడు. అభిమానంతో పాటు అవమానాలను కూడా ఎదుర్కొన్నాడు. పేడి ముఖం అన్న అవహేళ నుంచి మాస్ మసాలా హీరో అన్న కితాబు వరకు ఎగుడుదిగుళ్లతో సాగింది అతని కెరీర్. విమర్శలను తట్టుకొని రోజు తనకు తాను శిల్పంలా చెక్కుకుంటూ స్టైలిస్ స్టార్, ఐకాన్ స్టార్‌ల నుంచి జాతీయ ఉత్తమ నటుడిగా ఎదిగిన ‘సరైనోడు’ సినీ కెరీర్‌పై మైక్ టీవీ స్పెషల్ స్టోరీ.
డాడీ సినిమాలో..
1982 ఏప్రిల్ 8న జన్మించాడు అల్లు అర్జున్. ఇంట్లో అతడిని అందరూ ముద్దుగా బన్నీ అని పిలుచుకుంటారు. సిని ఫ్యామిలీ కావడంతో చిన్నప్పటి నుంచే సినిమాలపై ఆసక్తి పెంచుకున్నాడు. ఈ క్రమంలో డ్యాన్స్‌ను బాగా నేర్చుకున్నాడు. ఫ్యామిలీ ఫంక్షన్ ఏదైనా బిన్నీ స్టెప్స్ లేకుండా ఉండేది కాదు. అలా 20 ఏళ్ల వయసు ఉన్నప్పుడే సినీ రంగంలోకి ప్రవేశించారు. మెగాస్టార్ చిరంజీవి నటింటిన ‘డాడీ’ సినిమాలో ఓ డాన్సర్‌గా అల్లు అర్జున్ కనిపించాడు. చిత్రంలో ఉన్నది కాసేపైనా అందరి కళ్లు అతడి మీద పడేట్లు తన డ్యాన్స్‌తో మెస్మరైజ్ చేశాడు.
గంగోత్రితో ఎంట్రీ…
ఆ తరువాత ద‌ర్శ‌కేంద్రుడు రాఘ‌వేంద్ర‌రావు దర్శకత్వంలో 2003లో వచ్చిన ‘గంగోత్రి’ చిత్రంతో హీరోగా పరిచయమయ్యాడు. ఈ సినిమా ఆ టైంలో సెన్సేషనల్‌గా నిలిచింది. నటన పరంగా కూడా అల్లు అర్జున్కు మంచి మార్కులు పడ్డాయి. అయితే అల్లు అర్జున్ గ్లామర్‌పై కొందరు తీవ్ర విమర్శలు చేశాడు. వారందరికీ కొద్ది సమయంలోనే సమాధానం ఇచ్చేశాడు. ఆర్య సినిమాతో తనేమిటో నిరూపించుకున్నాడు. స్టైలిష్ లుక్, తనకున్న డ్యాన్స్ ప్రావీణ్యంతో యూత్‌లో క్రేజ్‌ను సంపాదించుకున్నాడు. 2005లో బన్నీ, 2007లో దేశ ముదురు, 2008లో వచ్చిన ప‌రుగు సినిమాతో ఒక్క సారిగా అగ్రనటుడిగా ఎదిగిపోయాడు. 2009లో వచ్చిన ఆర్య 2 చిత్రం ప్రేక్షకులు ఆదరించకపోయినా అల్లు అర్జున్ నటన, డ్యాన్స్‌కు ప్రశంసలు దక్కాయి. ఫ్లాపు, హిట్లతో సంబంధం లేకుండా డిఫరెంట్ కథలు, నటనకు అవకాశం ఉండే క్యారెక్టర్స్‌తో ముందుకు దూసుకుపోయాడు. ప్రతి ఒక్క సినిమాలో తన నటన నైపుణ్యాన్ని ప్రదర్శించాడు అల్లు అర్జున్. జులాయి, రేసు గుర్రం సినిమాలు బన్నీ హిట్ జాబితాను పెంచాయి.
ప్యాన్ ఇండియా రేంజ్‌లో ‘వేదం’ సినిమాలో కేబుల్ రాజు వంటి ఓ సామాన్య యువకుడిగా.. బద్రీనాథ్‌ సినిమాలో గొప్ప శిష్యుడిగా.. ఇద్ద‌ర‌మ్మాయిల మూవీలో లవర్ బాయ్‌గా అలరించడం అల్లు అర్జున్‌కే సాధ్యమైంది. క్యారెక్టర్ ఏదైనా కనెక్ట్ అయిపోయే నటుడు బన్నీ. స్టార్ హీరోగా కొన‌సాగుతున్న క్ర‌మంలోనే ‘రుద్ర‌మ‌దేవి’ సినిమాలో గెస్ట్ క్యారెక్టర్ చేసి అబ్బుర పరిచాడు. తెలంగాణ యాసలో అల్లు అర్జున్ కొట్టిన డైలాగులకు థియేటర్స్ దద్థరిల్లాయి. ‘సరైనోడు’ ‘డీజే’ సినిమాలు బన్నీ కెరీర్‌లో మైలురాయిగా నిలిచాయి. ఓ ఆర్మీ జవాన్‌గా ‘నా ఇల్లు ఇండియా నా పేరు సూర్య’లో అల్లు అర్జున్ నటన ప్రశంసనీయం.
‘అల‌వైకుంఠ‌పురం’లో సినిమాతో ఇండస్ట్రీ రికార్డు తిరగరాశాడు బన్నీ. రూ. 260కోట్ల గ్రాస్ క‌లెక్ష‌న్ల‌ను సాధించి నాన్-బాహుబ‌లి రికార్డును అధిగమించాడు. తరువాత వచ్చిన పుష్పతో ప్యాన్ ఇండియా స్టార్‌గా ఎదిగిపోయాడు. పుష్ప రాజ్‌గా దేశ వ్యాప్తంగా ఓ రేంజ్‌లో క్రేజ్ సంపాదించుకున్నాడు. ప్రస్తుతం ‘పుష్ప2’ షూటింగ్లో బిజీ అయ్యాడు. అభిమానులతో పాటు సినీ ప్రేక్షకులు సైతం పుష్ప పార్ట్‌-2 కోసం ఎంతో ఆసక్తితో ఎదురు చూస్తున్నారు. తెలుగు రాష్ట్రాలతో పాటు బెంగళూరు, కేరళలో కోట్ల మంది అభిమానులను సంపాదించుకోవడం వెనుక అల్లు అర్జున్ కష్టం చాలా ఉంది.
