Rajdhani Files : ‘రాజధాని ఫైల్స్’ విడుదలకు తొలగిన అడ్డంకులు
అమరావతి రైతుల ఉద్యమ నేపథ్యంలో తెరకెక్కిన ‘రాజధాని ఫైల్స్’ చిత్ర విడుదలకు హైకోర్టు గ్రీన్ సిగ్నల్ ఇచ్చింది. రివైజింగ్‌ కమిటీ అన్ని సర్టిఫికెట్లు పరిశీలించాకే ధ్రువపత్రం జారీ చేసిందని స్పష్టం చేసింది. సీఎం జగన్‌మోహన్‌ రెడ్డి, ప్రభుత్వ ప్రతిష్ఠను దిగజార్చేందుకు ఈ సినిమా తీశారని వైసీపీ రాష్ట్ర ప్రధాన కార్యదర్శి లేళ్ల అప్పిరెడ్డి హైకోర్టులో పిటిషన్‌ దాఖలు చేశారు. ఈ సినిమా సీబీఎఫ్‌సీ జారీ చేసిన ధ్రువపత్రాన్ని రద్దు చేయాలంటూ కోర్టును ఆశ్రయించారు. ఈ పిటిషన్‌పై ఈ నెల 13న విచారణ జరిపిన కోర్టు.. సినిమా ప్రదర్శనను తాత్కాలికంగా నిలువరిస్తూ గురువారం మధ్యంతర ఉత్తర్వులిచ్చింది. తాజాగా శుక్రవారం విచారణ చేపట్టి చిత్రం విడుదలకు ఓకే చెప్పింది
ఎన్నికల వేళ వైసీపీని చులకన చేయాలనే ఉద్దేశంతోనే సినిమాను తీశారని ఆ పార్టీ తరఫు లాయర్ వాదించారు. తమ అభ్యంతరాలను పరిగణనలోకి తీసుకోకుండా 'రాజధాని ఫైల్స్' చిత్ర ప్రదర్శనకు సెన్సార్ అధికారులు సర్టిఫికేట్ జారీ చేశారని విన్నవించారు. అయితే నిర్మాతల తరపు న్యాయవాది ఉన్నం మురళీధరరావు ఈ వాదనలను ఖండించారు. రివిజన్ కమిటీ సూచనల మేరకు ఆయా సన్నివేశాలను తొలగించామని.. ఆ తర్వాతే తమకు సెన్సార్ బోర్డు సర్టిఫికెట్ ఇచ్చిందని చెప్పారు. గతేడాది డిసెంబర్ లో సెన్సార్ సర్టిఫికెట్ వస్తే.. వైసీపీ నేతలు ఇప్పుడు కోర్టును ఆశ్రయించారని ధర్మాసనం దృష్టికి తెచ్చారు.
రాజధాని ఫైల్స్ సినిమా గురువారం రిలీజ్ కాగా.. ఈ చిత్రాన్ని ఉమ్మడి కృష్ణాలో 26 థియేటర్లతో పాటు కొన్ని మల్లీప్లెక్స్‌ల్లోనూ విడుదల చేశారు. ఉదయం ఆట మొదలయ్యే సరికి రెవెన్యూ అధికారులు థియేటర్లకు వచ్చి.. న్యాయస్థానం ఆదేశాల మేరకు ఈ చిత్ర ప్రదర్శనలను నిలిపివేస్తున్నట్లు ప్రకటించారు.. రెవెన్యూ అధికారులు వెళ్లే సరికి కొన్ని థియేటర్లలో షో మొదలైంది. ఆయా థియేటర్లలో మాత్రం మేనేజర్లు కోర్టు తీర్పు కాపీని ఇవ్వాలని రెవెన్యూ అధికారులను కోరారు. ఆ ఉత్తర్వులను టికెట్‌ కౌంటర్ల వద్ద అతికించారు. మ్యాట్నీ నుంచి పూర్తిగా నిలుపుదల చేయాలని ఆదేశించారు.
