భారతీయుడు 2 వీడియో రిలీజ్.. అతనికి చావే లేదు..
పాతికేళ్ల కిందట వచ్చిన ‘భారతీయుడు’ చిత్రం బాక్సాఫీసును బద్దలు కొట్టింది. దేశంలో అవినీతి పోవాలంటే అలాంటి భారతీయుడు ఊరికొకరు కావాలని జనం కోరుకున్నారు. ముసలివాడిగా కమల్ హాసన్ నటన, చూపు తిప్పుకోనివ్వని శంకర్ దర్శకత్వం చిరస్థాయిలో నిలిచిపోయాయి. దానికి సీక్వెల్‌గా వారిద్దరి కాంబినేషన్‌లో తెరకెక్కుతున్న ‘భారతీయుడు 2’ పై ఇండస్ట్రీలో భారీ అంచనాలు ఉన్నాయి. ఇప్పటికే తెగ సాగుతూ వస్తున్న ఈ ప్రాజెక్టు మొత్తానికి ఊపందుకుంది. ‘భారతీయుడు-2’ స్పెషల్‌ వీడియోను మూవీ టీమ్ శుక్రవారం విడుదల చేసింది.
సీక్వెల్ చిత్రంలోనూ కథ అవినీతి చుట్టే తిరుగుతుందని వీడియో చెబుతోంది. కాలానికి తగ్గట్టు మారిన అవినీతి భాగోతాన్ని శంకర్ నేటి ట్రెండ్‌ను దృష్టిలో పెట్టుకుని చూపాడు. ముసలి కమల్ ఓ టెలిఫోన్ బూత్ నుంచి ఫోన్ చేస్తూ ‘‘ఏ తప్పు జరిగినా నేను తప్పకుండా వస్తాను, భారతీయుడికి చావే లేదు’’ అని చెప్పే డైలాగ్‌తో మీడియో మొదలవుతుంది. కథాకాలం 1996 నుంచి 2023కు మారుతుంది. ప్రభుత్వాధికారులు కాంట్రాక్టర్ల నుంచి భారీగా లంచాలు తీసుకోవడం. భారీ నౌకపై హెలికాప్టర్ చక్కర్లు, పొట్టి దుస్తుల అమ్మాయిలు వంటి మనకాలపు అవినీతిని, జీవన శైలిని చూపారు. ‘నమస్తే ఇండియా.. భారతీయుడు ఈజ్ బ్యాక్’ అనే కమల్ డైలాగ్‌తోనే వీడియో ముగుస్తుంది. లైకా బ్యానర్ పై ఉదయనిధి స్టాలిన్, సుభాస్కరన్ అల్లిరాజాలు రూ. 250 కోట్ల బడ్జెట్‌తో నిర్మిస్తున్న ఈ చిత్రం వచ్చే ఏడాది విడుదల కానుంది. కాజల్, సిద్ధార్థ, రకుల్ ప్రీత్ సింగ్ తదితరులు నటిస్తున్నారు.
