తండ్రికి తగ్గ తనయుడు... గౌతమ్ చేసిన పనికి నెటిజెన్స్ ఫిదా !
సూపర్ స్టార్ మహేష్ బాబు రియల్ లైఫ్ లోను హీరో అనిపించుకున్నాడు.. సామాజిక కార్యక్రమాల ద్వారా ఎన్నో సేవలు చేశాడు. ముఖ్యంగా చిన్నారులకి గుండె ఆపరేషన్లు చేయించి వారికి కొత్త జీవితాన్ని అందించారు. సేవ చేయడంలో, తన గొప్ప మనసుని చాటడంలో మహేష్ బాబు తిరుగులేని హీరో అని చెప్పవచ్చు. చాలా కాలంగా మహేష్... ఆర్థికంగా వెనుకబడిన తల్లిదండ్రుల పిల్లల ఆరోగ్యం కోసం కృషి చేస్తున్నారు. తనకున్న మానవత్వాన్ని , సామాజిక సేవను చాటుకుంటున్నారు. అయితే అంతటి గొప్ప విషయాన్ని ఆయన చాలావరకు గోప్యంగా ఉంచారు.
మహేష్ బాబు కొడుకు గౌతమ్ నెలలు నిండక ముందే పుట్టాడు. దాంతో అతడిని కాపాడుకోవడం చాలా కష్టమైనది. గౌతమ్ దక్కుతాడో లేడో అన్నంత ఆందోళన చెందారు. వైద్యుల కృషితో గౌతమ్ ప్రాణాపాయ స్థితి నుండి బయటపడ్డాడు. మనకు డబ్బులు ఉన్నాయి కాబట్టి ఖరీదైన వైద్యం చేయించి... మన బిడ్డను కాపాడుకున్నాం.. కానీ పేదల పరిస్థితి ఏంటని మహేష్‌కి ఆ రోజే ఒక ఆలోచన వచ్చింది. వెంటనే మహేష్ బాబు ఫౌండేషన్ ఏర్పాటు చేసి గుండె జబ్బుతో బాధపడుతున్న చిన్నారులకు ఆపరేషన్స్ చేయిస్తున్నారు. ఇప్పటికి వందల మంది చిన్నారులకు వైద్యం అందించారు.
అలాగే ఏపీ, తెలంగాణాలలో మహేష్ బాబు రెండు గ్రామాలను సైతం దత్తత తీసుకున్నాడు. ఆ గ్రామాలకు అవసరమైన మౌలిక సదుపాయాలను అందిస్తున్నారు. అలాగే మహేష్ బాబు కొడుకు గౌతమ్ కూడా చిన్నప్పటి నుండే సేవా కార్యక్రమాల పట్ల ఆకర్షితుడయ్యాడు. తండ్రి బాటలోనే నడుస్తూ తరచుగా హాస్పిటల్స్‌ని సందర్శిస్తూ ఉంటాడు. మహేష్ బాబు ఫౌండేషన్ తరపున చికిత్స తీసుకుంటున్న చిన్నారుల తల్లిదండ్రులతో కలిసి ముచ్చటిస్తాడు. వారికి ధైర్యం నింపే స్ఫూర్తిదాయక మాటలు కూడా చెబుతాడు. స్కూల్ నుండి వచ్చాక రెయిన్‌బో ఆసుపత్రిలో రోగులతో మాట్లాడటం గౌతమ్‌కి ఇష్టమైన పనిగా నమ్రతా శిరోద్కర్ గతంలోనే వెల్లడించారు. తాజాగా రెయిన్‌బో ఆసుపత్రి సిబ్బందితో, చికిత్స పొందుతున్న రోగులతో గౌతమ్ మాట్లాడుతున్న ఫోటోలు ఆమె సోషల్ మీడియా‌లో షేర్ చేశారు. గౌతమ్ ను చూస్తుంటే గర్వంగా ఉందంటూ తెలిపారు. దీంతో గౌతమ్ కి ఉన్న సేవా గుణానికి నెటిజెన్స్ ఫిదా అవుతున్నారు.
అంతే కాకుండా మహేష్ బాబు దంపతులు తమ పిల్లల్ని విలువలతో పెంచారని అంటున్నారు. గౌతమ్ ఔదార్యం, సేవలో తండ్రిని తలపిస్తున్నాడని పలువురు నెటిజెన్స్ ప్రసంశలు కురిపిస్తున్నారు. ఇక మహేష్ బాబు గారాల పట్టి సితార ఇప్పటికే సెలబ్రిటీ హోదాను అందుకుంది. ఆమె బ్రాండ్ అంబాసిడర్‌గా పనిచేస్తుంది. అయితే గౌతమ్ సోషల్ మీడియాకు దూరంగా ఉంటారు. గౌతమ్ ప్రస్తుతం చదువుకుంటున్నాడు. చదుక పూర్తయ్యాక తండ్రి తరహాలో హీరోగా ఎంట్రీ ఇచ్చే ఛాన్స్ ఉంది. ఇప్పటికే గౌతమ్ ఒక సినిమాలో చైల్డ్ ఆర్టిస్ట్‌గా నటించి నటుడిగా తానేంటో చూపించాడు.
