గుంటూరు కారం సెన్సార్ పూర్తి

సూపర్ స్టార్ మహేష్ బాబు, త్రివిక్రమ్ కాంబినేషన్ లో 13యేళ్ల తర్వాత వస్తోన్న సినిమా గుంటూరు కారం. అంతకు ముందు వీరి కాంబోలో అతడు, ఖలేజా చిత్రాలు వచ్చాయి. కానీ బాక్సాఫీస్ వద్ద ఆశించిన ఫలితాలు అందుకోలేదు. అందుకే ఈ థర్డ్ మూవీపై భారీ అంచనాలు ఉన్నాయి. ఇన్నేళ్ల తర్వాత ఇద్దరి ఇమేజెస్ లోనూ మార్పులు వచ్చాయి. దీంతో గుంటూరు కారంలో ఉన్న ఘాటు ఎంతో తెలుసుకోవాలని ఫ్యాన్స్ తో పాటు ప్రేక్షకులు కూడా ఎదురుచూస్తున్నారు. కొన్నాళ్లుగా ఈ మూవీ నుంచి వస్తోన్న అప్డేట్స్ ఫ్యాన్స్ ను డిజప్పాయింట్ చేస్తున్నా.. నిర్మాత మాత్రం చాలా కాన్ఫిడెంట్ గా కనిపిస్తున్నాడు. మహేష్ ఫ్యాన్స్ కు తిరుగులేని వినోదం అందించబోతున్నాం అని నమ్మకంగా చెబుతూ వస్తున్నాడు. ఇక సంక్రాంతి బరిలో ఈ నెల 12న విడుదల కాబోతోన్న గుంటూరు కారం సెన్సార్ పూర్తయింది.

సెన్సార్ బోర్డ్ నుంచి గుంటూరు కారం చిత్రానికి యూ/ఏ సర్టిఫికెట్ వచ్చింది. సో.. ఇదొక యాక్షన్ ఎంటర్టైనర్ అనుకోవచ్చు. పండగ పూట ప్రేక్షకులకు మంచి వినోదం అందించే సినిమా అవుతుందని చాలామంది భావిస్తున్నారు. బట్ ఈ టైమ్ లో గట్టి పోటీ కూడా ఉంది. ఏ మాత్రం తేడా వచ్చినా మొదటి రోజుకే తేలిపోతుంది. అందుకే స్ట్రాంగ్ కంటెంట్ అయినా ఉండాలి లేదా మంచి ఎంటర్టైన్మెంట్ అయినా ఉండాలి. ఈ మేరకు త్రివిక్రమ్ పై నమ్మకం ఉన్నా.. ఇప్పటి వరకూ వచ్చిన పాటలే కాస్త తేడాగా ఉన్నాయనే టాక్ వచ్చింది. మొత్తంగా గుంటూరు కారంకు సెన్సార్ నుంచి యూ / ఏ సర్టిఫికెట్ వచ్చింది.