మీరు నన్నెంతో ఆదరించారు, కృతజ్ఞతలు-మృణాల్ ఠాకూర్ ఎమోషనల్ పోస్ట్

మృణాల్ ఠాకూర్...సీతారామం వచ్చేంతవరకు ఈమె గురించి పెద్దగా ఎవరికీ తెలియదు. తెలుగు వారికి అసలే తెలీదు. కానీ ఇప్పుడు వన్ ఆఫ్ ద బిజీ హీరోయిన్. దానికి కారణం సీతారామంలో ఆమె అందానికి, అభినయానికి దక్కిన మార్కులే. ఈ విషయాన్నే గుర్తు చేసుకుంటూ ఎమోషనల్ పోస్ట్ పెట్టారు మృణాల్ ఠాకూర్.

హనురాఘవపూడి దర్శకత్వంలో మృనాల్ ఠాకూర్, దుల్కర్ సల్మాన్ జంటగా వచ్చిన సినిమా సీతారామం. మంచి ఫీల్ గుడ్ మూవీగా సీతారామం సూపర్ సక్సెస్ అందుకుంది. ఈ మూవీ విడుదల అయి ఈరోజుకు ఏడాది అవుతోంది. అందుకే తెలుగు ప్రేక్షకులకు, మూవీ టీమ్ కు కృతజ్ఞతలు చెబుతున్నారీ ముద్దుగుమ్మ. నటిగా నా మొదటి సినిమా సీతారామం. నేను కన్న కలలను మించి మీరు నా మీద ప్రేమాభిమానాలు చూపించారు. నన్ను తెలుగింటి అమ్మాయిలా ఆదరించారు. అందుకు నేను ఎన్నిసార్లు ధన్యవాదాలు తెలిపినా సరిపోదు. మరిన్ని మంచి సినిమాలతో ఈ ప్రేమను నిలబెట్టుకుంటానని మాటిస్తున్నా అంటూ మృణాల్ ఎమోషనల్ పోస్ట్ పెట్టారు.

అలాగే మూవీ టీమ్ ను ఉద్దేశిస్తూ కూడా...నా నుంచి సీత బెస్ట్ వెర్షన్ ను రాబట్టిన దర్శకుడు హను రాఘవపూడికి, ఈ మొత్తం ప్రయాణాన్ని నాకు గుర్తుండిపోయేలా చేసిన హీరో దుల్కర్ సల్మాన్ కు...మొత్తం టీమ్ కు కూడా నా ధన్యవాదాలు అంటూ చెప్పుకొచ్చారు. దీంతో పాటూ సీతారామం మేకింగ్ వీడియోను కూడా పోస్ట్ చేశారు. మరోవైపు చిత్ర నిర్మాణ సంస్థ స్వప్నా సినిమా కూడా స్పెషల్ వీడియోలు షేర్ చేసింది.