నాన్న కోసం నాని తంటాలు

నేచురల్ స్టార్ నాని హీరోగా నటించిన సినిమా హాయ్ నాన్న. మృణాల్ ఠాకూర్ హీరోయిన్ గా నటించిన ఈ మూవీకి శౌర్యు దర్శకుడు. డిసెంబర్ 7న విడుదల కాబోతోన్న ఈ మూవీ టీజర్ కు మంచి స్పందన వచ్చింది. ఇప్పటి వరకూ విడుదలైన పాటలూ ఆకట్టుకున్నాయి. కానీ ఎందుకో నాని సినిమా అంటే ఒకప్పుడు ఉన్నంత క్రేజ్ ఈ మూవీకి అస్సలు రావడం లేదు. మూవీకి బజ్ తేవడానికి నాని ఎంత ట్రై చేస్తున్నా అస్సలు వర్కవుట్ కావడం లేదు అనేది బలంగా వినిపిస్తోంది.

అందుకే హాయ్ నాన్న ప్రమోషన్స్ కోసం నేచురల్ స్టార్ నానా తంటాలు పడుతున్నాడు. తాజాగా కేసీఆర్ ప్రెస్ మీట్ ను ఇమిటేట్ చేస్తూ చేసిన వీడియో అయితే.. నిజంగానే కొందరు యూ ట్యూబర్స్ స్థాయికి చేయాల్సిన వీడియోలా ఉంది తప్ప నాని స్థాయిది కాదు. అటు హీరోయిన్ మృణాల్ ఠాకూర్ ప్రమోషన్స్ కు పెద్దగా టైమ్ ఇవ్వడం లేదు. దీంతో మొత్తం బాధ్యత నానిమీదే పడింది. దీనికి తోడు జెర్సీ తర్వాత నాని ఇప్పటి వరకూ సాలిడ్ హిట్ అందుకోలేదు. జెర్సీ తర్వాత వచ్చిన నాని గ్యాంగ్ లీడర్, వి, టక్ జగదీష్ తో హ్యాట్రిక్ ఫ్లాపులు చూశాడు. శ్యామ్ సింగరాయ్ ఫర్వాలేదనిపించినా.. అంటే సుందరానికి పోయింది. దసరా మూవీ గురించి చాలా హైప్ చేసినా.. నిజానికి అది కమర్షయల్ గా చాలా చోట్ల లాస్ వెంచర్ అంటే ఫీలవుతారేమో. ఈ మొత్తం ఎఫెక్ట్ ఇప్పుడు హాయ్ నాన్న పై పడింది. దీనికి తోడు సినిమా థీమ్ అనేది ఆల్రెడీ చాలామందికి అర్థమైంది. అందుకే సినిమాకు మినిమం బజ్ కూడా రావడం లేదు అంటున్నారు.

నానితో పాటు డిసెంబర్ 8న నితిన్ ఎక్స్ ట్రా.. ఆర్డినరీ మేన్ తో పాటు వరుణ్ తేజ్ ఆపరేషన్ వాలైంటైన్ కూడా వస్తున్నాయి. నితిన్ మూవీ కాస్త ఫర్వాలేదు అనిపించుకుంటున్నా.. ఆపరేషన్ వాలైంటైన్ ప్రమోషన్స్ ఇంకా మొదలు కాలేదు. ఆల్రెడీ మొదలుపెట్టిన నాని హాయ్ నాన్నకు మాత్రం అనుకున్నంత హైప్ రావడం లేదు. మరి సినిమా ట్రైలర్ తర్వాతైనా కాస్త క్రేజ్ వస్తుందేమో చూడాలి.