మంచు విష్ణు డ్రీమ్ ప్రాజెక్ట్ లో ప్రభాస్

వరుస ప్లాప్లు ఎదుర్కొంటున్న ‘మా’ అధ్యక్షుడు, హీరో మంచు విష్ణు తన డ్రీమ్ ప్రాజెక్ట్ ను ప్రకటించిన విషయం తెలిసిందే. చాలా రోజుల తర్వాత జిన్నా సినిమాతో ప్రేక్షకుల ముందుకు వచ్చినా.. అది బాక్సాఫీస్ వద్ద బోల్తా కొట్టింది. విష్ణు డ్రీమ్ ప్రాజెక్ట్ అయిన ‘కన్నప్ప’ (భక్త కన్నప్ప) సినిమాతో మరోసారి రాబోతున్నాడు. దాదాపు రూ.100 కోట్ల బడ్జెట్ తో పాన్ ఇండియా లెవల్లో ఈ సినిమాను తెరకెక్కించబోతున్నాడు. ఆగస్టు 18 లాంఛనంగా శ్రీకాళహస్తిలో సినిమా పూజాకార్యక్రమాలు జరిపారు. డైలాగ్ కింగ్ మంచు మోహన్ బాబు ఈ సినిమాను నిర్మిస్తుండగా.. మంచు విష్ణు కథపై పనిచేస్తున్నాడు. ఈ సినిమాకు హిందోలో మహాభారత్ సీరియల్ తెరకెక్కించిన ముఖేష్ కుమార్ సింగ్ దర్శకత్వం వహిస్తుండగా.. విష్ణు సరసన నుపూర్ సనన్ నటిస్తోంది.

కాగా ఈ సినిమాకు సంబంధించిన ఓ తాజా వార్త ఇండస్ట్రీని షేక్ చేస్తుంది. పాన్ వరల్డ్ స్టార్ ప్రభాస్ ఈ సినిమాకు ఓకే చెప్పినట్లు తెలుస్తోంది. ప్రస్తుతం ప్రభాస్ చేతిలో మూడు సినిమాలు ఉండగా.. విష్ణు నటిస్తోన్న కన్నప్ప సినిమాలో గెస్ట్ రోల్ పోషించ బోతున్నట్లు సినీ వర్గాల్లో చర్చ జరుగుతోంది. కన్నప్ప సినిమాలో ప్రభాస్.. శివుడి పాత్రలో కనిపించనున్నాడట. దీంతో ప్రభాస్ అభిమానులతో పాటు, సినీ వర్గాల్లో చర్చలు మొదలయ్యాయి. సినిమా గురించి మాట్లాడిన విష్ణు.. ‘భారీ బడ్జెట్ తో, అత్యంత అధునాతన సాంకేతికతతో కన్నప్ప సినిమాను తెరకెక్కిస్తున్నాం. కన్నప్ప భక్తిని ఈ సినిమా ద్వారా చూపించబోతున్నాం. సింగిల్ షెడ్యూల్ లోనే సినిమా షూటింగ్ పూర్తవుతుంది. చిత్త పరిశ్రమలో ఉన్న గొప్ప నటీ నటులు ఈ సినిమాలో నటిస్తున్నారు. ఈ ప్రాజెక్ట్ కు సబంధించిన పూర్తి వివరాలు త్వరలో ప్రకటిస్తామ’ని అన్నాడు. కాగా ఈ సినిమాకు పరుచూరి గోపాలకృష్ణ, బుర్ర సాయి మాధవ్, తోట ప్రసాద్ తదితరులు పనిచేస్తున్నారు.