ప్రాజెక్ట్ Kలో కమల్ ఎంట్రీ కన్ఫామ్..ఇక విశ్వరూపం చూడాల్సిందే..

ప్రభాస్ ఫ్యాన్స్ ఎప్పుడెప్పుడా అని ఎదురుచూస్తున్న సినిమా ప్రాజెక్ట్ K . ఆదిపురుష్ ఫ్లాప్ తరువాత అభిమానులంతా ఈ మూవీపైనే బోలెడన్ని ఆశలు పెట్టుకున్నారు. మహానటి ఫేమ్ డైరెక్టర్ నాగ్ అశ్విన్ దర్శకత్వంలో భారీ బడ్జెట్‎తో పాన్ వరల్డ్ స్థాయిలో ప్రాజెక్ట్ K తెరకెక్కనుంది. ఈ సినిమాపై అంచనాలు గట్టిగానే ఉన్నాయి. డార్లింగ్ కు జోడీగా దీపికా పదుకొణె నటిస్తుండగా కీలక పాత్రలో బాలీవుడ్ స్టార్ హీరో అమితాబ్ కనిపించనున్నారు. తాజాగా చిత్రబృందం మరో క్రేజీ అప్‎డేట్‎ను అందించింది. ప్రాజెక్ట్ K లో కమల్ ఎంట్రీని కన్ఫామ్ చేసింది. ఎట్టకేలకు ప్రాజెక్ట Kలోకి కమల్ హాసన్ వచ్చారనే విషయాన్ని వైజయంతీ మూవీస్ అధికారికంగా సోషల్ మీడియాలో ప్రకటించింది. భారత్‎కు చెందిన ఇద్దరు బిగ్గెస్ట్ సూపర్ స్టార్స్ కలిశారంటూ ఓ చిన్న వీడియో రిలీజ్ చేశారు. ప్రస్తుతం ఈ వీడియో సెన్సేషన్‎ను క్రియేట్ చేస్తోంది. ఇలాంటి క్రేజీ కాంబినేషన్ ఈ మధ్యకాలంలో రాలేదని, ఇక విశ్వరూపం చూడాల్సిందేనంటూ ఫ్యాన్స్ కామెంట్లు పోస్ట్ చేస్తూ ఇంటర్నెట్‎ను షేక్ చేస్తున్నారు.

'ప్రాజెక్ట్ K'లో కమల్ హాసన్ ఉన్నారని తాజాగా నిర్మాతలు ప్రకటించారు. ఓ కీ రోల్‎లో ఆయన నటిస్తున్నారని క్లారిటీ ఇచ్చారు. అయితే ప్రభాస్ హీరోగా నటిస్తుండగా, కమల్ మాత్రం ఇందులో ప్రతినాయకుడిగా కనిపించబోతున్నారనే టాక్ బాగా వినిపిస్తోంది. కమల్‎ను ఒప్పించేందుకు నాగ్ అశ్విన్ గత సంవత్సరకాలంగా ప్రయత్నిస్తున్నారని ఈ మధ్య ఇండస్ట్రీలో బాగా టాక్ వినిపించింది. కమల్‎ను ఎలాగైనా తన ప్రాజెక్ట్‎లో భాగం చేసుకోవాలని ఎన్నో ప్రయత్నాలు చేశారట. ఎట్టకేలకు కమల్ ఓకే చెప్పడంతో మేకర్స్‎లో కొత్త ఊపు వచ్చింది. అసలు నాగ్ అశ్విన్ ఏం చెప్పి కమల్ ఒప్పించారనేది హాట్ టాపిక్‎గా మారింది.

ఈ సినిమాలో కమల్ హాసన్ క్యారెక్టర్ చాలా స్పెషల్ గా ఉంటుందట. హీరోతో సమానంగా, దాదాపు హీరో పాత్రలానే ఉంటుందని టాక్. కాకపోతే అక్కడక్కడ నెగెటివ్ షేడ్స్ లో కనిపిస్తారట. ఇలాంటి పాత్రకు కమల్ హాసన్ అయితేనే న్యాయం చేయగలరని అశ్విన్ భావించారట. అందుకే అన్ని విధాలుగా ప్రయత్నించి మొత్తానికి కమల్‎ను ఈ సినిమాలో భాగం చేశారు డైరెక్టర్.

విక్రమ్ సినిమాతో సెన్సేషన్ ను క్రియేట్ చేసిన కమల్ ప్రస్తుతం ఇండియన్ 2 చిత్రీకరణలో బిజీగా ఉన్నారు. దాదాపుగా ఈ చిత్రం షూటింగ్ పూర్తికావచ్చింది. ఈ సినిమాపైన ప్రేక్షకుల్లో భారీ అంచనాలు ఉన్నాయి. హిట్ పక్కా అని ముందే రాశిపెట్టుకున్నారు. ఇలాంటి సమయంలో హీరోగా కెరీర్ పీక్ స్టేజ్ లో ఉండగా కూడా కమల్ ప్రాజెక్ట్ K లో నటించేందుకు అంగీకరించారట. దీనిని బట్టి అర్థం చేసుకోవచ్చు ఈ చిత్రంలో ఆయన పాత్ర ఎంత స్పెషల్‎గా ఉంటుందో.