‘పుష్ప’ నటుడు జగదీశ్ అరెస్ట్.. అతని వేధింపులతో ఓ యువతి..

‘పుష్ప’ చిత్రంలో నటించిన బండారు జగదీశ్ అనే నటుణ్ని పంజాగుట్ట పోలీసులు అరెస్ట్ చేశారు. ఓ యువతిని వేధించి ఆమె ఆత్మహత్యకు కారణమయ్యాడని ఫిర్యాదు రావడంతో పోలీసులు బుధవారం అతణ్ని అదుపులోకి తీసుకున్నారు. పుష్ప సినిమాలో జగదీశ్.. హీరో అల్లు అర్జున్‌కు స్నేహితుడిగా నటించాడు. ఆ సినిమా హిట్ కావడంతో పలు అవకాశాలు వచ్చాయి.

ఓ మహిళా జూనియర్ ఆర్టిస్ గత నెల 27న తనకు తెలిసిన వ్యక్తితో సన్నిహితంగా ఉన్నప్పుడు జగదీశ్ దొంగచాటుగా వీడియో తీశాడని ఆరోపణలు ఉన్నాయి. ఆమె జగదీశ్‌కు ఇదివరకు పరిచయం ఉండడంతో ఏవో గొడవలు తలెత్తాయి. జగన్ దురుద్దేశంలో వీడియోలు తీసి వాటిని సోషల్ మీడియాలో పోస్ట్ చేస్తానని బెదిరింపులకు పాల్పడ్డంతో ఆమె గత నెల 29న ఉరి వేసుకుని ఆత్మహత్య చేసుకుంది. ఆమె కుటుంబ సభ్యుల ఫిర్యాదుతో పోలీసులు కేసు నమోదు చేశారు. జగదీశ్ అప్పట్నుంచి పరారీలో ఉన్నాడు. అతని ఆచూకీ తెలుసుకున్న పోలీసులు అరెస్ట్ చేయగా కోర్టు రిమాండ్‌కు పంపింది.