సలార్ టీజర్ ను 5.12 కే ఎందుకు రిలీజ్ చేస్తున్నారు..?
ప్రశాంత్ నీల్, ప్రభాస్ కాంబినేషన్ లో వస్తున్న క్రేజీ సినిమా సలార్. కేజీఎఫ్ సంచలనం తర్వాత ప్రశాంత్ తీస్తున్న ఈ సినిమా మీద చాలా అంచనాలే ఉన్నాయి. అందులోనూ ప్రభాస్ తో తీసిన అనేసరికి మరింత హైప్ ఉంది. ఇప్పుడు జులై 6 ఈ మూవీ టీజర్ ను విడుదల చేస్తున్నారు. అది కూడా ఉదయం 5.12 గంటలకు అని అనౌన్స్ చేశారు. ఇప్పుడు ఈ టైమ్ గురించే అందరూ మాట్లాడుకుంటున్నారు.
సలార్ టీజర్ ను మరో రెండు రోజుల్లో రిలీజ్ చేస్తున్నారు. అది కూడా తెల్లవారుఝామున 5.12 గంటలకు చేస్తామని ప్రకటించారు. ఇప్పటివరకు ఇలా మరీ నిమిషాలతో సహా ఏ సినిమా టీజర్ రిలీజ్ చేస్తామని ప్రకటించలేదు. మరో వైపు ప్రశాంత్ నీల్ ముందు సినిమా కేజీఎఫ్ కు సలార్ టీజర్ రిలీజ్ కు లింక్ ఉందని కూడా టాక్ నడుస్తోంది. కేజీఎఫ్2 క్లైమాక్స్‌లో యశ్ మీద సముద్రంలో దాడి జరిగిన సమయం ఆ సీన్‌లో యశ్ ప్రయాణించే ఓడలో సమయాన్ని 5.12 గా చూపించారు. ఇప్పుడు అదే సమయంలో ప్రశాంత్ నీల్ సలార్ టీజర్ రిలీజ్ చేస్తున్నారు. దీంతో సలార్‌ను కేజీఎఫ్ కు కొనసాగింపు అనుకుంటున్నారు నెటిజన్లు.
కేజీఎఫ్ గోల్ట్ మైనింగ్ బ్యాక్ గ్రౌండ్ లో సాగితే....సలార్ కోల్ మైనింగ్ నేపథ్యంలో తెరకెక్కుతోందని ప్రశాంత్ నీల్ చెప్పారు. రెండూ మైనింగ్ కు సంబంధించిన కథాంశమే కాబట్టి కచ్చితంగా లింక్ ఉండే ఉంటుందని నెట్ లో జోరుగా చర్చలు నడుస్తున్నాయి. యశ్ లుక్ లాగే ప్రభాస్ లుక్ కూడా రఫ్ గా ఉంది. ఇక ఈ సినిమా ఈ ఏడాది సెప్టెంబర్ 28న విడుదల అవనుంది. యాక్షన్ ఎంటర్టైనర్ గా తెరకెక్కుతోంది.
