Sree Vishnu : పగలబడి నవ్వేందుకు రెడీ అయిపోండి..శ్రీవిష్ణు 'స్వాగ్' టైటిల్ గ్లింప్స్ రిలీజ్
(Swag) టాలీవుడ్ యంగ్ హీరో శ్రీవిష్ణు వరుసగా సినిమాలు చేస్తూ బిజీ అయిపోయాడు. ఈమధ్యనే 'సామజవరగమన' మూవీతో మంచి హిట్ అందుకున్నాడు. ఆ సినిమాతో ఫుల్‌గా నవ్వించి తన కెరీర్‌లోనే బిగ్గెస్ట్ విజయాన్ని పొందాడు. ఇకపోతే త్వరలోనే 'ఓం భీమ్ బుష్' అనే మూవీతో ప్రేక్షకుల ముందుకు రానున్నాడు. నేడు శ్రీవిష్ణు పుట్టినరోజు సందర్భంగా ఈ హీరో మరో సినిమాను అనౌన్స్ చేశాడు. గతంలో 'రాజ రాజ చోర' సినిమా తీసి హిట్ కొట్టిన డైరెక్టర్ హసిత్ గోలితోనే ఇప్పుడు 'స్వాగ్' అనే సినిమా చేయనున్నాడు.
తాజాగా స్వాగ్ అనే మూవీ టైటిల్ గ్లింప్స్‌ని మేకర్స్ రిలీజ్ చేశారు. అడవిలో జంతువులన్నీ మాట్లాడుకుంటున్నట్లు, కథలు చెప్పినట్లుగా గ్లింప్స్ విడుదలైంది. ఆ జంతువులకు సునీల్, గంగవ్వ వాయిస్‌పు పెట్టి నవ్విస్తూ స్వాగ్ టైటిల్‌ని ప్రకటించారు. ఇక వీడియో చివర్లో ఈ సినిమా కథ మగవాడిదని, శ్వాగణిక వంశానిది అని శ్రీవిష్ణు వాయిస్‌తో ఎండ్ అవుతుంది. దీంతో ఈ మూవీ ఫుల్ కామెడీగా ఉంటుందని, పగలబడి నవ్వేందుకు సిద్దమైపోండని మేకర్స్ ప్రకటించారు.
స్వాగ్ మూవీని పీపుల్ మీడియా ఫ్యాక్టరీ వారు నిర్మిస్తున్నారు. ఈ మూవీకి వివేక్ సాగర్ మ్యూజిక్ అందిస్తున్నారు. రెండోసారి హసిత్ గోలి, శ్రీవిష్ణు కాంబోలో సినిమా వస్తుండటంతో ఈ మూవీపై భారీ అంచనాలు నెలకొన్నాయి. అంచనాలకు తగ్గట్లుగానే టైటిల్ గ్లింప్స్ విడుదలై అందర్నీ ఆకట్టుకుంటోంది. మొత్తానికి ఈ ఏడాది రెండు మూడు సినిమాలను విడుదల చేసేందుకు శ్రీవిష్ణు ప్లాన్ చేస్తున్నట్లు కనిపిస్తోంది. అన్నీ కూడా ప్రేక్షకులను ఆకట్టుకునేలా కామెడీ జోనర్‌ను ఎంచుకున్నట్లు తెలుస్తోంది. ఇకపోతే స్వాగ్ మూవీ గురించి మరిన్ని వివరాలు తెలియాలంటే ఇంకొంతకాలం ఎదురుచూడాల్సిందే.
