‘మట్టికథ’ను అందరూ చూడాలి.. హరీశ్ రావు

మట్టిని నమ్ముకున్న జీవితాలను అద్భుతంగా తెరకెక్కించిన చిత్రం ‘మట్టికథ’. వినూత్న కథాకథనాలతో రూపొందించిన ఈ సినిమా విడుదల కాకముందే అంతర్జాతీయ అవార్డులు కొల్లగొడుతోంది. ‘ఇండో-ఫ్రెంచ్ అంతర్జాతీయ చలన చిత్రోత్సవం’లో తొమ్మిది అవార్డులు వచ్చాయి. ఈ సందర్భంగా తెలంగాణ మంత్రి హరీశ్ రావు మూవీ టీమ్‌ను ప్రత్యేకంగా అభినందించారు. ‘‘ఇలాంటి విభిన్నమైన చిత్రాలను అందరూ చూడాలి. పెద్దపెద్ద స్టార్లు లేకపోయినా పెద్ద సినిమాకు తలదన్నేలా ఈ చిత్రాన్ని నిర్మించారు. ఈ అద్భుతమైన సినిమాను ప్రజలందరూ చూడాలి. దర్శకుడిని, మూవీ టీమ్ సభ్యలను అభినందిస్తున్నాను’’ అని అన్నారు.

పవన్ కడియాల దర్శకత్వం వహించిన ఈ మూవీని అన్నపరెడ్డి అప్పిరెడ్డి మైక్ మూవీస్ బ్యానర్‌పై నిర్మించారు. సహనిర్మాత సతీశ్ మంజీర. అజయ్ వేడ్ హీరోగా నటించిన ఈ చిత్రంలో ప్రముఖ జానపద గాయని కనకవ్వ, ‘బలగం’ తాత సుధాకర్ రెడ్డి, దయానంద్ రెడ్డి తదితరులు నటించారు. స్మరణ్ సాయి సంగీతం అందించగా కుంభం ఉదయ్ ఎడిట్ చేశారు. మైక్ మూవీస్ పతాకంపై వచ్చిన ‘జార్జిరెడ్డి’, ‘ప్రెజర్ కుకర్’ విడుదలై ప్రజాదరణ పొందాయి. ‘స్లమ్‌డాగ్ హజ్సెండ్’తోపాటు, బిగ్ బాస్ ఫేమ్ సోహైల్ హీరోగా రూపొందిన ‘మిస్టర్ ప్రెగ్నెంట్’ చిత్రాలు త్వరలో విడుదల కానున్నాయి.