బాలయ్య వర్సెస్ రవితేజ.. విన్నర్ ఎవరు..?

బాక్సాఫీస్ వద్ద స్టార్ వార్స్ కామన్. అయితే వీరిలో విన్నర్ ఎవరు అనేది ఆడియన్స్ క్రేజీగా మాట్లాడుకునే అంశం అవుతుంది. అప్పుడు ఏ హీరో ఎక్కువసార్లు గెలిస్తే ఆ హీరో ఫ్యాన్స్ గర్వంగా చెప్పుకుంటారు. ఏ ఇండస్ట్రీలో అయినా.. ఎంత పెద్ద హీరోలైనా హిట్లూ ఫ్లాపులు కామన్. కానీ కంపేర్ చేసినప్పుడు మాత్రం ఖచ్చితంగా స్టార్డమ్ తో పనిలేకుండా తేలిపోతారు. అలా త్వరలోనే దసరా బరిలో బాక్సాఫీస్ వార్ కు రెడీ అవుతున్నారు నందమూరి బాలకృష్ణ, రవితేజ. బాలయ్య భగవంత్ కేసరి అక్టోబర్ 19న విడుదల కాబోతోంది. రవితేజ టైగర్ నాగేశ్వరరావు అక్టోబర్ 20న రిలీజ్ అవుతుంది. అయితే ఈ ఇద్దరి గత సినిమాల రికార్డ్ లు చూసి సెంటిమెంట్ రిపీట్ అయితే బాలయ్య సినిమాకు ప్రాబ్లమ్ తప్పదు అంటూ కొందరు విశ్లేషణలు చేస్తున్నారు. అందుకు కారణం ఏంటో తెలుసా..?

బాలయ్య, రవితేజ గతంలో నాలుగుసార్లు బాక్సాఫీస్ వార్ లో తలపడ్డారు. ఒకట్రెండు సార్లు ఒక వారం గ్యాప్ లో కూడా వచ్చారు. అలా మొదటి సారి వీరి మధ్య 2008లో బాక్సాఫీస్ క్లాష్ జరిగింది. 2008 సంక్రాంతి బరిలో బాలయ్య ఒక్కమగాడు విడుదలైంది. సిమ్రన్, అనుష్క హీరోయిన్లుగా వైవీఎస్ చౌదరి డైరెక్ట్ చేసిన ఈ మూవీపై భారీ అంచనాలున్నాయి. బట్ మొదటి ఆటకే డిజాస్టర్ టాక్ తెచ్చుకుంది. ఇక ఆ తర్వాతి రోజు 11న రవితేజ, త్రిష జంటగా నటించిన కృష్ణ విడుదలైంది. ఈ మూవీ బిగ్గెస్ట్ హిట్ గా నిలిచి బాలయ్యను బీట్ చేసిన ఫస్ట్ సందర్భంగా నిలిచింది.

వీరి మధ్య మళ్లీ తర్వాతి యేడాదే బాక్సాఫీస్ క్లాష్ వచ్చింది. 2009 మే నెలలో ఒక వారం గ్యాప్ లో పోటీ జరిగింది. బాలకృష్ణ, ప్రియమణి జంటగా నటించిన మిత్రుడు 2009 మే 1న విడుదలైంది. ఈ మూవీకి జస్ట్ యావరేజ్ టాక్ వచ్చింది. ఆ తర్వాత వారం మే 8న రవితేజ కిక్ విడుదలైంది. ఇది అప్పటికి అతని కెరీర్ లోనే బిగ్గెస్ట్ హిట్. దీంతో రెండోసారి మరోసారి బాలయ్య పై రవితేజది అప్పర్ హ్యాండ్ అయింది.

మరోసారి బాలయ్య వర్సెస్ రవితేజగా నిలిచిన సందర్భం 2011 సంక్రాంతి బరిలో జరిగింది. 2011 జనవరి 12న బాలకృష్ణ, దాసర నారాయణరావు కాంబినేషన్ లో భారీ తాగారణంతో పరమవీరచక్ర విడుదలైంది. ఇప్పటికీ ట్రోల్ అవుతున్న ఈ సినిమా రిజల్ట్ గురించి ప్రత్యేకంగా చెప్పాల్సిన పనిలేదు. భారీ అంచనాలున్న పరమవీరచక్ర బాక్సాఫీస్ వద్ద డిజాస్టర్ గా నిలిచింది. ఆ తర్వాతి రోజు జనవరి 13న రవితేజ హీరోగా హరీష్ శంకర్ డైరెక్ట్ చేసిన మిరపకాయ్ విడుదలై బ్లాక్ బస్టర్ గా నిలిచింది. ఇలా మూడుసార్లు రవితేజ అప్పర్ హ్యాండ్ సాధించాడు.

అయితే రవితేజ పై బాలయ్య నెగ్గిన సందర్భం కూడా ఉంది.

2012 మే 25న రవితేజ దరువు విడుదలైంది. అప్పటికే రవితేజ రొటీన్ యాక్టింగ్ కు జనం మొహం మొత్తి ఉన్నారు. ఆ టైమ్ లో వచ్చిన దరువు పరమ బోరింగ్ అనిపించుకుంది. ఈ మూవీ తర్వాత వారం రోజులకు జూన్ 1న బాలకృష్ణ అధినాయకుడు విడుదలైంది. ఇది బ్లాక్ బస్టర్ అని చెప్పలేం కానీ.. బావుందన్న టాక్ తెచ్చుకుంది. ముఖ్యంగా ఫ్యాన్స్ కు బాగా నచ్చింది.

ఇక ఇప్పుడు మరోసారి దసరా బరిలో బాక్సాఫీస్ వార్ కు రెడీ అయ్యారీ ఇద్దరు స్టార్స్. వీరి మధ్య వార్ స్టార్ట్ అయినప్పుడు రవితేజ అంత పెద్ద స్టార్ కాదు. బట్ ఇప్పుడు అతని రేంజ్ మారింది. టైగర్ నాగేశ్వరరావు ట్రైలర్ బావుంది. కాకపోతే ఈ చిత్ర దర్శకుడు ఇంతకు ముందు దొంగాట, కిట్టు ఉన్నాడు జాగ్రత్త అనే రెండు డిజాస్టర్స్ తీసి ఉన్నాడు.

ఇక భగవంత్ కేసరికి వరుస విజయాల దర్శకుడు అనిల్ రావిపూడి కెప్టెన్. ఈ ట్రైలర్ కూ అద్భుతమైన రెస్పాన్స్ వచ్చింది. అయితే ఈ రెండు సినిమాలూ.. గతంలోని రికార్డులను రిపీట్ చేయకుండా సెంటిమెంట్ లేకుండా.. దసరా బరిలో బాక్సాఫీస్ ను షేక్ చేయాలని కోరుకుందాం.