సినిమా రిలీజ్ కాలేదని నిర్మాతకు గుండెపోటు

కోట్లు పెట్టి తీసిన భారీ బడ్జెట్ సినిమా రిలీజ్ కు నోచుకోకపోవడం, అప్పుల ఒత్తిడి మీదపడటంతో నిర్మాత విజయ్ జాగర్లమూడి గుండెపోటుకు గురయ్యారు. భారీ బడ్జెట్ తో తీసిన ఆయన ఖుదీరామ్‌ బోస్‌ సినిమా రిలీజ్ కు అడ్డంకులు రావడంతో ఆయనకు ఈ పరిస్థితి వచ్చింది. ప్రస్తుతం విజయ్ హాస్పిటల్ లో చికిత్స పొందుతున్నారు. స్వాతంత్య్ర సమరయోధుడు, స్వాతంత్య్రోద్యమంలో పాల్గొన్న అతి పిన్న వయస్కుడు ఖుదీరామ్ బోస్ జీవిత కథ ఆధారంగా తీసిన చిత్రమిది. ఆజాదీకా అమృత్ మహోత్సవ్ లో భాగంగా ఈ సినిమాను పలు సందర్భాల్లో ప్రత్యేకంగా ప్రదర్శించారు. గోవాలో జరిగిన ఇంటర్నేషనల్ ఫిల్మ్ ఫెస్టివల్ ఆఫ్ ఇండియా వేడుకల్లో ఈ సినిమా ప్రదర్శించగా అక్కడ కూడా విశేష స్పందన వచ్చింది. కానీ థియేటర్లలో విడుదలకు మాత్రం ప్రతికూలతలు ఏర్పడ్డాయి. దీంతో మానసిక ఒత్తిడితో విజయ్ గుండెపోటుకు గురై ఆసుపత్రి పాలయ్యాడు. ఈ సినిమా తెలుగు, తమిళం, మలయాళం, కన్నడ, బెంగాలీ, హిందీ భాషల్లో రూపొందించారు. విద్యాసాగర్ రాజు దర్శకత్వం వహించాడు.