Gami teaser : అఘోరగా మారిన విశ్వక్ సేన్.. 'గామి' టీజర్ రిలీజ్

టాలీవుడ్ కుర్ర హీరో విశ్వక్ సేన్ చిత్ర పరిశ్రమలో సరికొత్త ప్రయోగాలు చేస్తూ వస్తున్నాడు. తాజాగా ఆయన నటిస్తున్న సినిమా గామి. ఈ మూవీ షూటింగ్ నాలుగేళ్లుగా జరుగుతోంది. అయితే ఇప్పుడు విడుదలకు సిద్దమైంది. మార్చి 8వ తేదిన గామి సినిమా విడుదలకు సిద్ధమవుతోంది. ఈ మధ్యనే ఈ మూవీ ప్రమోషన్స్ కూడా ప్రారంభం అయ్యాయి. విద్యాధర్ కాగిత దర్శకత్వంలో ఈ మూవీ తెరకెక్కుతోంది. తాజాగా ఈ మూవీ నుంచి మేకర్స్ టీజర్ రిలీజ్ చేశారు.

టీజర్ ఆద్యంతం ఆసక్తిగా సాగింది. గామిలో విశ్వక్ సేన్ ఒక అఘోరగా కనిపించనున్నాడు. టీజర్ ప్రారంభం అవ్వగానే ఆ సమస్యకు పరిష్కారం అంటూ ఓ మ్యాప్‌ను చూపిస్తారు. టీజర్ చివర్లో అఘోరగా విశ్వక్ సేన్‌ను చూపిస్తారు. అవన్నీ దాటుకుని నావల్ల అవుతుందా అంటూ విశ్వక్ చెప్పే డైలాగ్ కథను చెప్పేస్తోంది. టీజర్‌ను బట్టి చూస్తే ఈ మూవీ ఓ అఘోరాకు వచ్చిన సమస్య గురించి చెప్పేలా ఉంది. అలాగే ఆ సమస్యకు హిమాలయాల్లో పరిష్కారం దొరుకుతుందని, మ్యాప్ పట్టుకుని దాని కోసం వెతకడానికి వెళ్తాడని స్పష్టంగా తెలుస్తోంది.

ఈ మూవీని కాశీ, హిమాలయాల్లో ఎక్కువ శాతం షూట్ చేసినట్లు తెలుస్తోంది. గామి ట్రైలర్ ఈ నెల 29వ తేదిన విడుదల చేయనున్నట్లు మేకర్స్ ప్రకటించారు. గామిలో కలర్ ఫోటో ఫేమ్ చాందిని చౌదరి హీరోయిన్‌గా చేస్తోంది. గతంలో హీరో విశ్వక్..అశోకవనంలో అర్జున కళ్యాణం, పాగల్ వంటి సినిమాలతో మెప్పించి ఆడియన్స్‌కు దగ్గరయ్యారు. ఇప్పుడు సరికొత్త ప్రయోగంతో మరోసారి ప్రేక్షకుల ముందుకు రాబోతున్నాడు.