నిరాశపర్చిన ధోని బౌలర్..డెబ్యూ మ్యాచ్ లోనే 16 వైడ్లు..

ఐపీఎల్ 2023లో వెలుగులోకి వచ్చిన యంగ్ ప్లేయర్స్‌లో సీఎస్కే బౌలర్ పతిరానా ఒకడు. కెప్టెన్ ధోని సలహాలతో టోర్నీలో అద్భుతంగా రాణించాడు. డెత్ ఓవర్లలో భారీ హిట్టర్స్‌కు సైతం కళ్లెం వేసి తన టాలెంట్‌ను నిరూపించుకున్నాడు. మలింగ శైలిలో బౌలింగ్ చేసే ఈ శ్రీలంక యంగ ప్లేయర్ ఐపీఎల్‌లో రాణించడం ద్వారా.. స్వదేశానికి ఆడే అవకాశాన్ని దక్కించుకున్నాడు.

ఆఫ్ఘనిస్తాన్‌తో జరిగే వన్డే సిరీస్ కోసం శ్రీలంక జాతీయ జట్టులో పతిరానా‎కు చోటుదక్కింది.అయితే భారీ అంచనాలతో బరిలోకి దిగిన పతిరానా మొదటి వన్డేలో తీవ్రంగా నిరాశపర్చాడు. ఆఫ్గాన్ బ్యాటర్లు..ఈ యువ బౌలర్‌ను ఓ ఆటాడేసుకున్నారు. మొత్తం 8.5 ఓవర్లు బౌలింగ్ వేసిన పతిరానా.. 66 పరుగులు సమర్పించుకున్నాడు. అంతే కాకుండా ఈ మ్యాచులో పతిరానా వైడ్ ల వర్షం కురిపించాడు. ఏకంగా 16 వైడ్లు వేసి విమర్శలు ఎదుర్కొంటున్నాడు. మ్యాచ్ విషయానికొస్తే శ్రీలంక విధించిన 269 పరుగుల లక్ష్యాన్ని మరో 19 బంతుల్లోనే మిగిలి ఉండగానే 6 వికెట్ల తేడాతో ఆఫ్ఘనిస్తాన్ ఘన విజయం సాధించింది.

అద్భుతమైన టాలెంట్ ఉన్న పతిరానాకు ఎక్స్ ట్రాలు భారీగా ఇవ్వడం ఓ వీక్‌నెస్. ఐపీఎల్ 2023లోను అత్యధిక వైడ్స్ వేసి బౌలర్ పతిరానా కావడం గమనార్హం. అతడు టోర్నీలో మొత్తం 29 వైడ్ బాల్స్ వేశాడు. పతిరానా తర్వాత 27 వైడ్లతో సిరాజ్ రెండో స్థానంలో ఉన్నాడు.