మహిళా పోలీసుపై దాడి .. ఎన్కౌంటర్లో నిందితుడు హతం
గత నెల ఆగష్ట్ 30 న రైలులో ప్రయాణిస్తున్న మహిళా కానిస్టేబుల్‌పై దాడి చేసిన నిందితుడు ఉత్తరప్రదేశ్‌లో జరిగిన ఓ ఎన్ కౌంటర్ లో హతమయ్యాడు. ఎన్కౌంటర్లో అతను చనిపోయినట్లు గుర్తించామని పోలీసులు శుక్రవారం తెలిపారు. ఎదురు కాల్పుల్లో అతని ఇద్దరు సహాయకులు కూడా తీవ్రంగా గాయపడ్డారని, వారి అరెస్టు చేశామని పోలీసులు తెలిపారు. గత నెలలో అయోధ్య సమీపంలోని సరయూ ఎక్స్‌ప్రెస్‌లో ఎక్కిన ఓ మహిళా కానిస్టేబుల్ తో.. సీటు విషయంలో ఓ వ్యక్తి గొడవపడ్డాడు. అది కాస్త ఘర్షణగా మారి.. నిందితుడు తన స్నేహితులతో కలిసి ఆమెను తీవ్రంగా గాయపర్చాడు. అనంతరం అయోధ్య స్టేషన్‌ రాగానే వారంతా రైలు దిగి పారిపోయారు. రైలు కంపార్ట్‌మెంట్‌లో రక్తపు మడుగులో స్పృహకోల్పోయి ఉన్న ఆ మహిళా కానిస్టేబుల్‌ను రైల్వే పోలీసులు వెంటనే ఆసుపత్రికి తరలించారు.
ఈ ఘటనకు సంబంధించి వాట్సప్‌లో వైరల్‌ అయిన వార్తలను సుమోటోగా స్వీకరించిన అలహాబాద్‌ హైకోర్టు.. యూపీ ప్రభుత్వం, రైల్వే పోలీసులపై తీవ్ర ఆగ్రహం వ్యక్తం చేసింది. నిందితులను గుర్తించి, అరెస్టు చేయాలని యూపీ పోలీసులను ఆదేశించింది. ఈ క్రమంలోనే పోలీసులు దర్యాప్తు ప్రారంభించగా.. దాడిలో ప్రధాన నిందితుడు అనీస్ ఖాన్‌గా గుర్తించారు. అతడిని అరెస్టు చేసే క్రమంలో ఎన్ కౌంటర్ చోటు చేసుకుంది. ఎన్కౌంటర్లో గాయపడిన అనీస్ ఖాన్ చికిత్స పొందుతూ మరణించగా, అతని సహాయకులు ఆజాద్, విషంభర్ దయాల్‌లను అరెస్టు చేసినట్లు పోలీసులు తెలిపారు.
"నిందితులను సాంకేతిక, మాన్యువల్ ఇన్‌పుట్‌లు బాధితుడి ఫోటో ఆధారంగా గుర్తించాం. దీని ఆధారంగా, అయోధ్య పోలీసులు, ప్రత్యేక టాస్క్‌ఫోర్స్ వారిపై దాడి చేశాయి" అని అయోధ్య సీనియర్ సూపరింటెండెంట్ ఆఫ్ పోలీస్, రాజ్ కరణ్ నయ్యర్ తెలిపారు. దాడి సమయంలో నేరస్థులు తమపై కాల్పులు జరిపారని, దీంతో పోలీసులు ప్రతిగా కాల్పులు జరిపేలా ఒత్తిడి తెచ్చారని చెప్పారు. ఈ కాల్పుల్లో ఇద్దరు గాయపడగా, మూడో వ్యక్తి పరారయ్యాడు. అతని ఆచూకీ కోసం కార్డన్ సెర్చ్ ప్రారంభించామని నయ్యర్ చెప్పారు. అతడిని గుర్తించి... నేరస్థుడిని లొంగిపోవాలని అడిగారు, కానీ అతను పోలీసులపై కాల్పులు జరిపాడు, ప్రతీకార కాల్పుల్లో గాయపడ్డాడు. అనంతరం చికిత్స పొందుతూ మృతి చెందాడని తెలిపారు.
