విమానాల్లో వెళ్లి దొంగతనాలు..కేరళలో తెలంగాణ వ్యక్తి అరెస్ట్

అతనో దొంగ.. మామూలు దొంగ కాదు హై ప్రొఫైల్ దొంగ. పక్క రాష్ట్రాలే అతడి టార్గెట్. అందుకోసం ఏకంగా విమానాల్లో వెళ్తాడు. తాళం ఉన్న ఇళ్లను టార్గెట్ చేస్తాడు. కేవలం బంగారం మాత్రమే దొంగతన చేస్తాడు. ఆ బంగారాన్ని కూడా అక్కడే తాకట్టు పెట్టి.. డబ్బుతో తిరిగి సొంతూరికి వస్తాడు. ఈ హైటెక్ దొంగను కేరళ పోలీసులు అరెస్ట్ చేయడంతో అసలు విషయం వెలుగులోకి వచ్చింది.

కేరళలోని తిరువనంతపురంలో ఇటీవల మూడు వరుస దొంగతనాలు జరిగాయి. ఈ కేసులో ఓ ఆటో డ్రైవర్‌ ఇచ్చిన కీలక సమాచారం ఆధారంగా పోలీసులు దర్యాప్తు చేపట్టారు. ఈ దర్యాప్తులో భాగంగా తెలంగాణకు చెందిన శంకర్ అనే వ్యక్తిని అరెస్ట్ చేశారు. గత రెండు నెలల్లో శంకర్ నాలుగు సార్లు విమానంలో కేరళకు వచ్చినట్లు అక్కడి పోలీసులు తెలిపారు. మొత్తం మూడు చోరీలు చేసినట్లు చెప్పారు.

‘‘ శంకర్ జూన్‌లో ఓ ఆటో రిక్షాలో తిరువనంతరపురం సిటీ మొత్తం రెక్కీ నిర్వహించాడు. పగటిపూట తాళం వేసి ఉన్న ఇళ్లను గుర్తిస్తాడు. రాత్రిపూట గూగుల్ మ్యాప్ ఉపయోగించి తాళాలు పగలగొట్టి ఇళ్లలోకి చొరబడతాడు. కేవలం బంగారం మాత్రమే చోరీ చేస్తాడు. ఆ తర్వాత బంగారాన్ని తాకట్టు పెట్టి వచ్చిన డబ్బులతో ఎంజాయ్ చేస్తాడు’’ అని పోలీసులు తెలిపారు. శంకర్పై గతంలో కూడా చోరీ కేసులు ఉన్నట్లు పోలీసులు వివరించారు.