పెరుగుతున్న ధరలు.. టామాటా రైతు దారుణ హత్య

పెరుగుతున్న టామాటా ధరలు సామాన్యుడికి భారంగా మారగా.. ఇన్నాళ్లకు కలిసొచ్చిన ధరలతో రైతులు లాభపడుతున్నారు. అయితే అన్ని చోట్లా పరిస్థితి అలా లేదు. టామాటా పంటకు మంచి గిరాకీ ఉందని తెలిసి కొందరు దారుణాలకు తెగబడుతున్నారు. చేలో పంటను దొంగతనంగా కాజేస్తున్నారు. వాహనాల్లో వెళ్తున్న టామాటాల లోడులను దొంగలిస్తున్నారు. అడ్డొచ్చిన వారిపై అమానుషంగా ప్రవర్తిస్తున్నారు. ఇలాంటి ఘటనే అన్నమయ్య జిల్లా మదనపల్లిలో జరిగింది. టమాట అమ్మిన రైతు వద్ద డబ్బులు ఉంటాయన్న అనుమానంతో అతన్ని దారుణంగా హత్య చేశారు. మృతుడు బోడి మల్లెదిన్నెకు చెందిన నారెం రాజశేఖర్ రెడ్డి గా గుర్తించారు.

పోలీసులు తెలిపిన వివరాల ప్రకారం... మదనపల్లె మండలం బోడిమల్లదిన్నెకు చెందిన నారెం రాజశేఖర్‌రెడ్డి టమాటా రైతు. కొద్దిరోజులుగా పంటకు భారీగా డిమాండ్ రావడంతో ఊరి చివర ఉన్న పొలంలోనే భార్యతో కలసి నివాసం ఉంటున్నాడు. రాజశేఖర్‌రెడ్డి ఇప్పటికే ఐదు కోతలు టమాటాలు కోసి అంగళ్లులో ఉన్న మార్కెట్‌లో విక్రయించారు. మంగళవారం కూడా టమాటాలను మార్కెట్‌లో దించి వచ్చారు. మంగళవారం రాత్రి పాలు పోయడానికి ఊళ్లోకి వెళ్లిన రాజశేఖర్‌రెడ్డి.. ఎంత సేపటికీ తిరిగి రాకపోవడంతో భార్య జ్యోతికి అనుమానం వచ్చింది. ఆమె బెంగుళూరులో ఉంటున్న తమ కుమార్తెలకు సమాచారం ఇచ్చింది.. వారు ఫోన్‌ చేయగా ఎవరూ ఎత్తలేదు. ఈ విషయం తెలియడంతో రాజశేఖర్‌రెడ్డి బంధువు వెతుక్కుంటూ వెళ్లారు.. దారి మధ్యలో బైక్, మొబైల్ పడి ఉండటాన్ని గమనించి చుట్టుపక్కల వెతికారు. ఇంతలో చింత చెట్టు కింద చేతులు, కాళ్లు కట్టేసి రాజశేఖర్ రెడ్డి మృతదేహం కనిపించింది. వెంటనే పోలీసులకు సమాచారం ఇచ్చారు.. వారు ఘటనా స్థలానికి చేరుకుని దర్యాప్తు చేస్తున్నారు.

కొంతకాలంగా టమాటా ధరలు పెరగడంతో.. రైతు రాజశేఖర్ రెడ్డి దగ్గర డబ్బులు ఉన్నాయని భావించి.. దోచుకోవడానికి వచ్చి ఈ దారుణానికి ఒడిగట్టి ఉంటారని పోలీసులు అనుమానిస్తున్నారు. ఈ క్రమలోనే పాలు పోసి వస్తుండగా.. మార్గ మధ్యలో దుండగులు అటకాయించి పక్కనే ఉన్న చింతచెట్టు కిందకు లాక్కెళ్లి చేతులు, కాళ్లు కట్టేసి, టవల్ మెడకు బిగించి ఊపిరాడకుండా చేసి చంపేశారని చెబుతున్నారు. ఆయన నిన్న మార్కెట్ కు 71 క్రేట్ల టమాటాను తీసుకువచ్చాడు. రైతు టమాటాలు అమ్మి వచ్చిన డబ్బులు దోచుకోవడానికి వచ్చిన దుండగులు అతడిని హత్య చేసి ఉంటారని పోలీసులు అనుమానిస్తున్నారు. అయితే ఈ ఘటనకు ముందు పొలం దగ్గర ఉన్న ఇంటికి వెళ్లిన గుర్తు తెలియని వ్యక్తులు టమాటా కాయలు కావాలని రాజశేఖర్‌రెడ్డి ఎక్కడున్నాడని ఆయన భార్య జ్యోతిని ప్రశ్నించినట్లు చెబుతున్నారు. ఆయన పాలు పోయడానికి ఊళ్లోకి వెళ్లినట్లు చెప్పడంతో అక్కడి నుంచి వారు వెళ్లిపోయారట. మొత్తం మీద టమాటా ధరల ప్రభావం పాపం రైతును కూడా బలి తీసుకుంది.