Medaram : ఇవాళ మేడారం హుండీల తరలింపు.. ఎక్కడికంటే..?

మేడారం మహా జాతర వైభవంగా జరిగింది. ఈ నెల 21 నుంచి 24 వరకు జాతర కొనసాగింది. శనివారం సమ్మక్క, సారలమ్మ వనప్రవేశంతో ఈ మహాజాతర మగిసింది. ఈ జాతరకు కోటిన్నర మంది భక్తులు తరలివచ్చి అమ్మవార్లను దర్శించుకున్నట్లు కలెక్టర్ తెలిపారు. ఇవాళ మేడారం నుంచి హుండీలను తరలించనున్నారు. హన్మకొండలోని టీటీడీ కళ్యాణ మండపానికి ఈ హుండీలను తరలిస్తారు. మేడారంలో మొత్తం 512 హుండీలను ఏర్పాటు చేశారు. ఈ నెల 29 నుంచి హుండీల లెక్కింపు చేపడతారు. పదిరోజుల పాటు ఈ లెక్కింపు కొనసాగనుంది.

మేడారంలో బుధవారం తిరుగువారం పండగ నిర్వహిస్తారు. మేడారం గ్రామస్థులు, ఆదివాసీలు ఇళ్లను శుద్ధి చేసి, అమ్మవార్లకు ప్రత్యేక పూజలు చేస్తారు. అప్పటివరకు భక్తులు అమ్మవార్లను దర్శించుకుంటారని అధికారులు తెలిపారు. తిరిగి 2026లో ఈ మహాజాతర మళ్లీ జరగనుంది. ఇక మేడారం జాతరకు వచ్చిన భక్తులను సురక్షితంగా గమ్యస్థానాలకు చేర్చిన ఆర్టీసీ సిబ్బందికి ఎండీ సజ్జనార్ అభినందనలు తెలిపారు. అతి తక్కువ సమయంలోనే మెరుగైన మౌలిక సదుపాయాలు కల్పించి.. భక్తులకు అసౌకర్యం కలిగించకుండా చర్యలు తీసుకున్నామని వివరించారు.