హైదారాబాద్, నెల్లూరులో తనిఖీలు..10కిలోల బంగారం పట్టివేత
హైదరాబాద్‌, నెల్లూరు జిల్లాల్లో భారీగా బంగారం పటుబడ్డింది. మొత్తం 10.27 కిలోల బంగారాన్ని డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ అధికారులు స్వాధీనం చేసుకున్నారు. నెల్లూరు జిల్లాలోని వెంకటాచలం టోల్‌ ప్లాజా వద్ద అధికారులు వాహనాల తనిఖీ చేపట్టారు. ఈ క్రమంలో టోల్‌ గేట్‌ వైపు వచ్చిన కారును తనిఖీ చేయగా.. సీటు కింద దాచి అక్రమంగా తరలిస్తున్న 7.798 కిలోల విదేశీ బంగారాన్ని గుర్తించి స్వాధీనం చేసుకున్నారు.
ఈ బంగారాన్ని తరలిస్తున్న ఇద్దరు నిందితులను అదుపులోకి తీసుకున్నారు. వారిని విచారించి..హైదరాబాద్‌లో మరోచోట అక్రమ బంగారం ఉన్నట్లు తెలుసుకున్నారు. వెంటనే మరో బృందం ఆ ప్రాంతానికి చేరుకొని 2.471 కిలోల బంగారాన్ని స్వాధీనం చేసుకున్నారు. కేసు నమోదు చేసిన డీఆర్‌ఐ అధికారులు.. బంగారాన్ని తరలిస్తున్న ఇద్దరు క్యారియర్లు, ఒక రిసీవర్‌ను అరెస్ట్ చేసి జ్యుడిషియల్‌ రిమాండ్‌కు తరలించారు.
