చేయని నేరానికి 29 ఏళ్ల శిక్ష.. సారీ చెప్పిన పోలీసులు
చేయని నేరానికి ఓ మాజీ ఎస్ఐ.. 29 ఏళ్ల శిక్ష అనుభవించాక.. అతడికి ఏ పాపం తెలియదని, నిర్దోషిగా ప్రకటిస్తూ తీర్పు వెలువరించింది హైకోర్టు. తీర్పు కాస్త ఆలస్యంగా వచ్చినా న్యాయం జరిగినందుకు ఆ వ్యక్తి ఆనందం వ్యక్తం చేస్తున్నారు. పశ్చిమ బెంగాల్‌లోని కోల్కతా లో ఈ ఘటన జరిగింది. శైలేన్ దాస్ (70) అనే వ్యక్తి 1993లో కోల్కతా పోలీస్ శాఖ ఈఎస్‌డీ( Economic Statistics Division) డివిజన్ SI గా విధులు నిర్వర్తించారు. ఈ క్రమంలో ఓ కేసులో శైలేన్దాస్ ప్రమేయం ఉందని భావించిన ఉన్నతాధికారులు.. అతడిపై విచారణ చేపట్టి.. ఉద్యోగం నుంచి తొలగించారు. అయితే శైలేన్దాస్.. ఆ కేసులో తనతప్పేమి లేదని స్టేట్ అడ్మినిస్ట్రేటివ్ ట్రైబ్యునల్(SAT)లో ఫిర్యాదు చేశారు. కానీ అతడు చేసిన అభ్యర్థనను ఎస్ఏటీ తిరస్కరించింది. దీంతో పట్టువదలని సైలన్దాస్ ట్రైబ్యునల్ తీర్పును కోల్కతా హైకోర్టు(Calcutta High Court)లో సవాల్ చేశారు.
ఈ కేసు ఎంతకాలానికి పరిష్కారమవుతుందో తెలియని శైలేన్దాస్.. కోర్టు చుట్టూ తిరిగి ఉన్న డబ్బు కూడా పొగొట్టుకున్నాడు. ఆర్థిక స్థోమత సహకరించక, జీవనోపాధి అయిన ఉద్యోగంపై ఆశలు కూడా వదులుకున్నారు. అప్పటికే అనారోగ్య కారణాలతో ఆయన మంచం పట్టారు. అయితే మూడు దశాబ్దాల సుదీర్ఘకాలం తర్వాత కోల్కతా హైకోర్టు ఆయనకు శుభవార్త తెలిపింది. శైలేన్ దాస్ను నిర్దోషిగా ప్రకటించి తీర్పు వెలువరించింది. దాస్ను ఎక్కడున్న కనుక్కోవాలని పోలీసులను ఆదేశించింది. న్యాయస్థానం ఆదేశాలతో శైలేన్దాస్కు సంబంధించిన పత్రాలను అధికారులు పరిశీలించి.. కేసు మొత్తం వ్యవహారాన్ని కోర్టుకు నివేదించారు. పోలీసులు అన్ని ఫైళ్లు తిరగేసి అతికష్టంమీద శైలేన్దాస్ చిరునామా కనుక్కొని.. అతడి ఇంటికి కారు పంపించి పోలీసు కార్యాలయానికి పిలిపించారు. ఆయన కేసు ఫైళ్లు అన్ని పరిశీలించి దాస్ బాధితుడని ప్రకటించారు. తప్పు జరిగిపోయిందని పోలీసులు అతడిని క్షమాపణలు కోరారు. అంతేకాకుండా హైకోర్టు ఆదేశాల మేరకు శైలేన్దాస్కు రావాల్సిన అన్ని ప్రయోజనాలను అందివ్వాలని పోలీసు ఉన్నతాధికారులు నిర్ణయించారు. అయితే.. కాస్త ఆలస్యంగానైనా కోర్టు తనకు న్యాయం చేసినందుకు మాజీ పోలీస్ ఆనందం వ్యక్తం చేశారు.
