ఇకపై ఏపనికైనా బర్త్ సర్టిఫికేట్ తప్పనిసరి
అక్టోబర్ 1వ తారీఖు నుంచి రిజిస్ట్రేషన్ ఆఫ్ బర్త్స్ అండ్ డెత్స్-2023 చట్టం దేశవ్యాప్తంగా అమల్లోకి రాబోతోంది. ఈ మేరకు కేంద్ర హోం మంత్రిత్వశాఖ తాజాగా నోటిఫికేషన్ను రిలీజ్ చేసింది. దీంతో అన్ని రకాల అధికారిక డాక్యుమెంట్ల జారీకి బర్త్ సర్టిఫికేట్ కీలకంగా మారనుంది. కళాశాలల్లో అడ్మిషన్లు పొందాలన్నా, డ్రైవింగ్ లైసెన్స్ జారీ చేయాలన్నా, ఒటర్ల లిస్టులో పేరు నమోదు కావాలన్నా, ఆధార్ అందించాలన్నా , మ్యారేజ్ రిజిస్ట్రేషన్లు అయినా సరే బర్త్ సర్టిఫికేట్ ఒక కీలక డాక్యుమెంట్‌గా మారనుంది. భవిష్యత్తులో సర్కార్ పేర్కొనే ఇతర అవసరాలకు ఈ సర్టిఫికేట్ అవసరం ఉంటుందని కేంద్ర మంత్రి ఓ ప్రకటనలో తెలిపారు.
అంతే కాదు ఈ చట్టం అమలులోకి వస్తే దేశవ్యాప్తంగా జననమరణాలకు సంబంధించి ఏకీకృత డేటాబేస్ రెడీ అవుతుందని, తద్వారా మరింత సమర్థవంతంగా ప్రజాసేవలు అందుబాటులోకి వస్తాయని తెలిపారు.
1969 వచ్చిన చట్టానికి సవరణలు చేసి కేంద్ర ప్రభుత్వం ఈ కొత్త చట్టాన్నితీసుకువచ్చింది. గత నెలలో పార్లమెంట్ సమావేశాల్లో రిజిస్ట్రేషన్ ఆఫ్ బర్త్స్ అండ్ డెత్స్-2023 చట్టానికి ఆమోదం తెలిపారు. ఆగస్టు 1న లోక్‌సభ ఈ బిల్లును ఆమోదించింది. ఆగస్టు 7న రాజ్యసభ మూజువాణి ఓటుతో ఈ చట్టానికి గ్రీన్ సిగ్నల్ తెలిపింది. రిజిస్ట్రార్ జనరల్ ఆఫ్ ఇండియా ఆధ్వర్యంలో నేషనల్ వైడ్గా జననమరణాల డాటాబేస్ తయారు చేసేందుకు ఈ చట్టం అవకాశం కల్పించినట్లైంది. ఈ చట్టంలో భాగంగా దేశవ్యాప్తంగా ఉన్న రాష్ట్రాల్లోని చీఫ్ రిజిస్ట్రార్లు, లోకల్ బాడీస్లోని రిజిస్ట్రార్లు తమ పరిధిలోని జననమరణాల వివరాలను నేషనల్ డాటాబేస్‌లో పొందుపరచాల్సి ఉంటుంది. అంతేకాకుండా, శిశువుల జననాల రిజిస్ట్రేషన్ టైంలోనే పేరెంట్స్ ఆధార్ డీటైల్స్ నమోదు చేయాల్సి ఉంటుంది.
