ICUలోనికి రానివ్వలేదని ఆస్పత్రిపై బుల్డోజర్ చర్య.. యూపీలోనే
ఐసీయూ గదిలోకి రానివ్వలేదని ఆసుపత్రిపై బుల్డోజర్ చర్యకు సిద్ధపడ్డారు ఉత్తర్ప్రదేశ్లోని లఖ్నవూ మున్సిపల్ కార్పొరేషన్ మేయర్. షూ వేసుకుని ఐసీయూ గదిలోకి వెళ్లొద్దన్నందుకు ఆస్పత్రి స్టాఫ్తో గొడవపడి.. బుల్డోజర్ చర్యకు పిలుపునిచ్చారు. దీంతో ఆస్పత్రి ప్రాంగణంలో తీవ్ర రసాభాస జరిగింది.
ఆసుపత్రి మేనేజ్మెంట్ చెప్పిన వివరాల ప్రకారం.. బిజ్నోర్లో ఉన్న వినాయక్ మెడికేర్ ఆస్పత్రిలో.. మున్సిపల్ ఉద్యోగి ఒకరు అనారోగ్యంతో చికిత్స పొందుతున్నారు. ఆ రోగిని చూసేందుకు మిగతా సిబ్బందితో కలిసి.. లక్నో మున్సిపల్ మేయర్ సుష్మా ఖర్వాల్ సోమవారం అక్కడికి వెళ్లారు. షూ వేసుకుని ఐసీయూ గదిలోకి ప్రవేశిస్తున్న ఆమెను.. అస్పత్రి సిబ్బంది అడ్డుకున్నారు. షూ వేసుకుని లోపలికి వెళితే.. రోగి ఇన్ఫెక్షన్ బారిన పడతారని హెచ్చరించారు. షూ విప్పేసి ఐసీయూ గదిలోకి వెళ్లాల్సిందిగా ఆమెను కోరారు. దీంతో ఆగ్రహానికి గురైన మేయర్ సుష్మా ఖర్వాల్.. ఆస్పత్రి సిబ్బందిపై ఇష్టమొచ్చినట్లు మాట్లాడారు. ఆస్పత్రి మేనేజ్మెంట్ కూడా ఏమాత్రం వెనక్కి తగ్గలేదు.. ఈ క్రమంలోనే ఇద్దరికు మధ్య తీవ్ర వాగ్వాదం జరిగింది.
ఆగ్రహానికి లోనైన మేయర్.. వెంటనే బుల్డోజర్ ఆస్పత్రి వద్దకు రావాలని మున్సిపల్ సిబ్బంది, ఎన్‌ఫోర్స్‌మెంట్ స్క్వాడ్ను ఆదేశించారు. వెంటనే వారంతా అక్కడికి చేరుకోవడం వల్ల ఆస్పత్రి ప్రాంగణంలో తీవ్ర రసాభాస జరిగింది. దీనిపై సమాచారం అందుకున్న పోలీసులు.. వెంటనే అక్కడికి చేరుకుని పరిస్థితిని చక్కదిద్దారు. ప్రస్తుతానికి ఆస్పత్రిపై మున్సిపల్ సిబ్బంది ఎలాంటి చర్యలు తీసుకోలేదు. కానీ ఆస్పత్రి నిర్మాణం అక్రమంగా జరిగిందని మున్సిపల్ అధికారులు చెబుతున్నారు. పూర్తి స్థాయిలో విచారణ జరిపి.. మరికొద్ది రోజుల్లో ఆస్పత్రిపై చర్యలు తీసుకుంటామని వారు పేర్కొన్నారు. అయితే షూ వేసుకుని ఐసీయూ గదిలో వెళ్లిన ఆరోపణలను మేయర్ సుష్మా ఖర్వాల్ ఖండించారు. తమ సిబ్బంది, వారి కుటుంబ సభ్యులకు అందుతున్న సేవల గురించి తెలుసుకునేందుకు ఇక్కడికి వచ్చానని పేర్కొన్నారు.
