పెట్రోల్ కోసం ఎగబడుతున్న జనం.. అధికారుల కీలక నిర్ణయం..

హిట్ అండ్ రన్ చట్టాన్ని నిరసిస్తూ దేశవ్యాప్తంగా డ్రైవర్ల ఆందోళన కొనసాగుతోంది. ఆయిల్ ట్యాంకర్ల డ్రైవర్లు సైతం ఇందులో పాల్గొంటుండటంతో పెట్రోల్, డీజిల్ కోసం జనం ఎగబడుతున్నారు. స్టాక్ అయిపోకముందే వీలైనంత ఎక్కువ పెట్రోల్ కొనేందుకు జనం మొగ్గు చూపుతున్నారు. ఈ క్రమంలో చాలా చోట్ల పెట్రోల్ బంకుల్లో నో స్టాక్ బోర్డులు దర్శనమిస్తున్నాయి. ఈ నేపథ్యంలో చండీఘడ్ అధికారులు కీలక నిర్ణయం తీసుకున్నారు.

చండీఘడ్లో చాలా మంది వాహనదారులు లీటర్లకొద్దీ పెట్రోల్ కొనుగోలు చేస్తుండటంతో అధికారులు అలర్ట్ అయ్యారు. టూవీలర్ కలిగిన వారికి 2 లీటర్లు, ఫోర్ వీలర్ ఉన్న వారికి 5 లీటర్లు పెట్రోల్ మాత్రమే ఇవ్వాలని ఆదేశించారు. ఈ మేరకు జిల్లా మెజిస్ట్రేట్ ఉత్తర్వులు జారీ చేసింది. ఈ నిర్ణయం వెంటనే అమల్లోకి వస్తుందని స్పష్టం చేశారు. అందరికీ పెట్రోల్, డీజిల్ అందుబాటులో ఉంచాలన్న ఉద్దేశంతోనే ఈ నిర్ణయం తీసుకున్నట్లు అధికారులు చెబుతున్నారు.

పెట్రోల్ బంకుల ఆపరేటర్లు ఈ నిబంధనలు కచ్చితంగా పాటించాలని, కస్టమర్లు సైతం సహకరించాలని కోరారు. సాధారణ పరిస్థితులు నెలకొనే వరకు ఈ నిబంధనలు కొనసాగుతాయని అధికారులు స్పష్టం చేశారు.