టమాటా పంటకు సీసీ కెమెరాలతో రక్షణ
దేశవ్యాప్తంగా టమాటాల ధరలు చుక్కలు చూపిస్తున్నాయి. కిలో ధర వంద దాటింది. పలు ప్రాంతాల్లో రూ.150, 200 కూడా పలుకుతోంది. దీంతో సామాన్యులకు టమాటా ప్రియంగా మారింది. ధరలు మండిపోతుండడంతో టమాటా దొంగలు ఎక్కువయ్యారు. దుకాణాల్లో, పంట పొలాల్లో దొంగతనాలు చోటుచేసుకుంటున్నాయి. పలు ప్రాంతాల్లో వ్యాపారులు సెక్యూరిటీని పెట్టి టమాటాను విక్రయిస్తున్న దృశ్యాలు కనిపిస్తున్నాయి.
మరోవైపు టమాటాకు భారీ డిమాండ్ నేపథ్యంలో రైతులకు పంట పడింది. లక్షల రూపాయలను సంపాదించే అవకాశం దొరక్కడతో ఆనందం వ్యక్తం చేస్తున్నారు. అయితే పండించిన పంటను కాపాడుకోవడం తలనొప్పిగా మారింది. టమాటా దొంగలు పెరగడంతో ఆందోళన వ్యక్తం చేస్తున్నారు. చేతికొచ్చిన పంటను దొంగలు కొట్టేయకుండా పొలంలోనే కాపలా కాస్తున్నారు.
లక్షలు విలువ చేసే పంటను కాపాడుకొనేందుకు రక్షణ చర్యలు చేపడుతున్నారు. తాజాగా కర్ణాటకకు చెందిన రైతు సోదరులు టమాటా తోటకు సీసీటీవీ కెమెరాలను ఏర్పాటు చేసి.. తమ వ్యవసాయ క్షేత్రంలో ప్రతి కదలికను గమనిస్తున్నారు. మైసూరు జిల్లా హన్ సుర్ మండలంలో రైతు సోదరులకు నగేశ్, కృష్ణకు 10 ఎకరాల పొలం ఉండగా వాటిలో మూడు ఎకరాల్లో టమాటను సాగు చేస్తున్నారు. ఇటీవల పొలంలో దొంగలు పడి దోచేశారు. దీంతో సీసీ కెమెరాలు ఏర్పాటు చేసుకున్నారు. అనంతరం రెండు సీసీటీవీ కెమెరాలను అమర్చి.. తమ మొబైల్ ఫోన్లకు అనుసంధానం చేసుకున్నారు. దీని ద్వారా పంటను ప్రతి క్షణం గమనిస్తున్నారు.
