Delhi : ఢిల్లీలో ఘోర అగ్ని ప్రమాదం..11 మంది మృతి

ఢిల్లీలో ఘోర అగ్ని ప్రమాదం చోటుచేసుకుంది. నార్త్ ఢిల్లీలోని అలీపూర్ ప్రాంతంలో దయాల్ పూర్ మార్కెట్ లోని పెయింట్ ఫ్యాక్టరీలో భారీగా మంటలు చేలరేగాయి. పేలుడు జరిగి తర్వాత క్షణాల్లోనే ఫ్యాక్టరీ మొత్తం మంటలు వ్యాపించినట్లు స్థానికులు తెలిపారు. ఒక్కసారిగా అనుకోకుండా జరిగిన ఈ అగ్ని ప్రమాదంలో 11మంది చనిపోయినట్లు ఢిల్లీ ఫైర్ సర్వీస్ అధికారి చెప్పారు. నిన్న సాయంత్రం 5 గంటలకు ఫ్యాక్టరీలో అగ్ని ప్రమాదం సంభవించినట్లు స్థానికులు తెలిపారు. సమాచారం అందిన వెంటనే ఫైర్ సిబ్బంది ప్రమాద స్థలానికి చేరుకున్నారు. 150 మంది ఫైర్ సిబ్బంది దాదాపు నాలుగు గంటలు కష్టపడి మంటలను అదుపులోకి తీసుకువచ్చారు.

కాగా ప్రమాదానికి గల కారణాలపై పోలీసులు ఆరా తీస్తున్నారు. అయితే ఫ్యాక్టరీకి ఫైర్ సేఫ్టీ అనుమతులు లేవని అధికారులు చెబుతున్నారు. మంటలు చుట్టు పక్కలకు వ్యాపించడంతో పక్కనే ఉన్న ఇండ్ల గోడలు కాలిపోయాయి. ముందుగా ఫ్యాక్టరీలోని గ్రౌండ్ ఫ్లోర్ నుంచి మంటలు ఎగసి పడ్డట్లు చెప్పారు పోలీసులు. బిల్డింగ్ కు ఒకే మెట్ల దారి ఉండడంతో ఆప్రాంతంలో మంటలు విపరీతంగా రావడంతో..ఎవరూ బయటకు రాలేకపోయారని తెలిపారు. ప్రమాదంలో 11 చనిపోగా మరో నాలుగురు తీవ్రంగా గాయపడ్డారు. వారిని స్థానిక ఆసుపత్రికి తరలించారు పోలీసులు.