ఎర్రచందనం సాగు చేయొచ్చు.. రవాణా చేయొచ్చు.. కేంద్రమంత్రి
ఎర్రచందనాన్ని సంక్లిష్ట వాణిజ్య ప్రక్రియ సమీక్ష(Review of Significant Trade) నుంచి తొలగించినట్లు కేంద్ర పర్యావరణ, అటవీశాఖ మంత్రి భూపేందర్‌యాదవ్‌ వెల్లడించారు. 2004 నుంచి భారత్‌లో లభ్యమయ్యే ఎర్రచందనం రివ్యూ ఆఫ్ సిగ్నిఫికెంట్ ట్రేడ్ (RST) కింద ఉందని, ఇప్పుడు ఆ నిబంధన నుంచి తొలగించడం వల్ల రైతులకు ఎర్రచందనం సాగుకు ప్రోత్సాహం లభిస్తుందన్నారు.
అంతరించిపోతున్న జంతుజాలం మరియు వృక్షజాలం (CITES) యొక్క అంతర్జాతీయ వాణిజ్యంపై స్విట్జర్లాండ్‌లోని జెనీవాలో 6 నవంబర్ 2023 నుండి 10 వ తేదీ వరకు 77 వ సమావేశాలు జరిగాయి. 1976 నుండి CITESలో ఒక భాగంగా ఉన్న భారత్ ఈ సమావేశాల్లో పాల్గొంది. డా. ఎస్పీ యాదవ్ నేతృత్వంలోని ప్రతినిధి బృందం, అటవీశాఖ అదనపు డైరెక్టర్ జనరల్ (PT) & CITES మేనేజ్‌మెంట్ అథారిటీ-ఇండియా పాల్గొన్న ఈ సమావేశంలో ఎర్రచందనంపై ఉన్న ఆంక్షలు తొలగించేందుకు నిర్ణయం తీసుకున్నట్లు కేంద్ర మంత్రి వెల్లడించారు. దీంతో ఇప్పటి నుంచి రైతులు ఎర్రచందనాన్ని పండించి, ఎగుమతి చేయడానికి వీలుపడుతుందన్నారు.
ఎర్రచందనం( Pterocarpus santalinus )ఏపీలోని కొన్ని జిల్లాల్లో మాత్రమే దొరికే అరుదైన, మార్కెట్‌లో అత్యంత విలువున్న చెట్టు. ఈ చెట్టు జాతులు 1994 నుండి CITES క్రింద అనుబంధం IIగా జాబితా చేయబడ్డాయి. సహజ అడవుల్లో భాగమైన ఈ జాతులు అక్రమ కోత మరియు రవాణాకు గురై అడవుల క్షీణతకు దారితీస్తున్నాయి.
