దుబాయ్ లాటరీలో తెలుగు వ్యక్తికి జాక్‌పాట్
దుబాయ్ డ్యూటీ ఫ్రీ మిలీనియం మిలియనీర్ (Dubai Duty Free Millennium Millionaire) లాటరీలో తెలుగు ఎన్నారై కి జాక్‌పాట్ తగిలింది. దుబాయ్ ఇంటర్నేషనల్ ఎయిర్‌పోర్ట్‌లో నిర్వహించిన దుబాయ్ డ్యూటీ ఫ్రీ మిలీనియం మిలియనీర్ ప్రమోషన్ డ్రాలో.. అనంతపురం జిల్లా తాడిపత్రి పట్టణానికి చెందిన 45 ఏళ్ల కర్ణయ్య మండోళ్ల 1 మిలియన్ అమెరికన్ డాలర్లు (రూ. 8.22కోట్లు) గెలుచుకున్నాడు. దీంతో అతడు రాత్రికి రాత్రే కోటీశ్వ‌రుడ‌య్యాడు. అక్టోబర్ 5న ఆన్‌లైన్ ద్వారా కొనుగోలు చేసిన లాటరీ టికెట్‌ కర్ణయ్యకు ఇలా అదృష్టాన్ని తెచ్చిపెట్టింది. కర్ణయ్య దుబాయ్‌లో సాఫ్ట్‌వేర్ ఇంజనీర్‌గా పనిచేస్తున్నాడు. ఈ క్రమంలో కొంతకాలంగా దుబాయ్ డ్యూటీ ఫ్రీ రాఫెల్‌లో పాల్గొంటున్నాడు. ఇప్పుడు లక్ కలిసి రావడంతో గ్రాండ్ ప్రైజ్‌మనీ గెలుచుకున్నాడు.
ఇక ఇంత భారీ మొత్తం గెలుచుకోవడం పట్ల కర్ణయ్య హర్షం వ్యక్తం చేశాడు. ఈ సందర్భంగా అతడు మాట్లాడుతూ.. తాను గెలిచిన భారీ ప్రైజ్‌మనీలో కొంత మొత్తాన్ని తన పిల్లల చదువుల కోసం డబ్బు ఆదా చేస్తానని అన్నాడు. మరికొంత భాగం స్వచ్ఛంద కార్యక్రమాలకు వెచ్చిస్తానని చెప్పుకొచ్చాడు. ఇదిలాఉంటే.. 1999లో ప్రారంభ‌మైన దుబాయ్ డ్యూటీ ఫ్రీ రాఫెల్‌లో ఇప్ప‌టివ‌ర‌కూ 1 మిలియన్ డాలర్లు గెలుచుకున్న భార‌తీయుల్లో కర్ణయ్య 217వ వ్య‌క్తి. కాగా, ఈ డ్యూటీ ఫ్రీ రాఫెల్ టికెట్ల కొనుగోలుదారుల్లో ఎక్కువ మంది భార‌తీయులేన‌ని లాటరీ నిర్వాహ‌కులు తెలియ‌జేశారు.
గత ఏప్రిల్ లో హైదరాబాద్ కు చెందిన ఓ అమ్మాయికి దుబాయ్ లాటరీ తగిలింది. ఆమె రూ. 100తో లాటరీ కొనుగోలు చేశారు. ఆమెకు డ్రాలో ఏకంగా రూ. 2.20 కోట్లను గెలుచుకున్నారు. దుబాయ్‌లో హైదరాబాద్ కు చెందిన మహిళ ఇలాంటి లాటరీ గెలవడం ఇజే తొలిసారి. హైదరాబాద్ కు చెందిన హమీద బేగం అనే మహిళ.. అబుదాబిలో రూ. 2.2 కోట్ల రూపాయల లాటరీ గెలుచుకున్నారు.
