బ్రిడ్జి పైనుంచి రైల్వేట్రాక్‌పై పడిన కారు.. ఐదుగురికి తీవ్రగాయాలు
మహారాష్ట్రలో ఘోర రోడ్డు ప్రమాదం జరిగింది. 44వ నంబర్‌ హైవేపై వెళ్తున్న కారు అదుపు తప్పి రైల్వే ఓవర్‌ బ్రిడ్జి (ఫ్లైవోవర్‌)పైనుంచి కింద ఉన్న రైల్వే ట్రాక్‌పై పడింది. ఆదివారం ఉదయం 7.30 గంటలకు నాగపుర్‌- ఇంగన్‌ఘాట్‌ మార్గంలోని బోర్‌ఖేడి సమీపంలో 796/16 పాయింట్‌ వద్ద ఈ ఘటన చోటుచేసుకుంది. మొత్తం నాలుగు ట్రాక్‌లు ఉండగా.. 3, 4 ట్రాక్‌ల మధ్య కారు పడింది. ఈ ప్రమాదంలో అందులోని ఐదుగురు ప్రయాణికులకు గాయాలయ్యాయి. క్షతగాత్రులను స్థానికులు సమీపంలోని ఆస్పత్రికి తరలించారు.
కారు రైల్వే ట్రాక్‌పై పడటం చూసిన వెంటనే స్థానికులు స్పందించి పోలీసులకు సమాచారమిచ్చారు. స్థానికుల సమాచారంతో అప్రమత్తమైన రైల్వే అధికారులు.. ఆ మార్గంలో అరగంట సేపు రైళ్లను నిలిపివేశారు. పోలీసులతో కలిసి కారులోని క్షతగాత్రులను వెలికితీసి చికిత్స నిమిత్తం నాగ్‌పూర్‌లోని ఓ ప్రైవేట్‌ ఆస్పత్రికి తరలించారు స్థానికులు. ప్రస్తుతం వారికి చికిత్స కొనసాగుతున్నది. పోలీసులు ఘటనపై కేసు నమోదు చేసి దర్యాప్తు చేపట్టారు.ఫ్లైవోవర్‌పై కారు అదుతప్పి, కింద ఉన్న రైల్వేట్రాక్‌పై పడిందని బుటిబోరి స్టేషన్‌ పోలీసులు తెలిపారు. ఆ సమయంలో ట్రాక్‌పై రైలు రాకపోవడంతో పెను ప్రమాదం తప్పిందన్నారు. ఇక రైల్వే అధికారులు.. కారును పక్కకు తొలగించిన తర్వాత రైళ్ల రాకపోకలను పునరుద్ధరించారు.
