బెంగళూరులో ఘోర అగ్నిప్రమాదం.. 22 బస్సులు దగ్ధం..

బెంగళూరులో భారీ అగ్ని ప్రమాదం జరిగింది. ఓ గ్యారేజీలో మంటలు చెలరేగి 22 బస్సులు దగ్ధమయ్యాయి. వీరభద్రగనగర్‌లోని గ్యారేజ్‌లో బస్సులకు వెల్డింగ్‌ పనులు చేస్తున్న సమయంలో ఈ ప్రమాదం జరిగింది. అయితే ఈ ఘటనలో ఎవరికీ ఎటువంటి గాయాలు కాకపోవడంతో అంతా ఊపిరిపీల్చుకున్నారు. వెల్డింగ్‌ చేస్తుండగా మంటలు చెలరేగి మిగతా వాహనాలకు వ్యాపించడంతో 22 బస్సులు దగ్ధం అయినట్లు పోలీసులు తెలిపారు. సమాచారం అందుకున్న అగ్నిమాపక సిబ్బంది అక్కడికి చేరుకొని మంటలను ఆర్పేశారు.

ప్రమాదం సమయంలో పెద్ద ఎత్తున మంటలు, పొగ వ్యాపించడంతో స్థానికులు భయాందోళన చెందారు. గ్యారేజీలో మొత్తం 35 బస్సులు ఉండగా.. 22 బస్సులు కాలిపోయాయి. వీటిలో 18 బస్సులు పూర్తిగా కాలి బూడిదవ్వగా.. మరో నాలుగు బస్సులు మాత్రం మంటలు అంటుకొని పాక్షికంగా దెబ్బతిన్నాయని పోలీసులు చెప్పారు. ఈ ప్రమాదానికి సంబంధించి స్పష్టమైన కారణాలు తెలుసుకొనేందుకు సమగ్ర దర్యాప్తు చేపట్టినట్లు తెలిపారు.