హైదరాబాద్‌‌కు రాష్ట్రపతి...ఆ రూట్లలో ట్రాఫిక్ ఆంక్షలు

భారత రాష్ట్రపతి ద్రౌపది ముర్ము నేడు హైదరాబాద్‎లో పర్యటించనున్నారు. గచ్చిబౌలిలో నిర్వహిస్తున్న అల్లూరి సీతారామారాజు 125వ జయంతి ముగింపు వేడుకల్లో ముర్ము పాల్గొననున్నారు. మంగళవారం ఉదయం 10గంటలకు ప్రత్యేక విమానంలో ఢిల్లీ నుంచి హకీంపేట వైమానిక దళ శిక్షణ కేంద్రానికి ముర్ము చేరుకుంటారు. అనంతరం రోడ్డు మార్గంలో బొల్లారంలోని రాష్ట్రపతి నిలయానికి వెళ్తారు. అక్కడి నుంచి సా.5 గంటల సమయంలో హెలికాప్టర్ ద్వారా గచ్చిబౌలిస్టేడియానికి వెళ్లి అల్లూరి జయంతి ముగింపు వేడుకల్లో పాల్గొంటారు.

ముర్ము పర్యటన నేపథ్యంలో నగరంలోని పలు ప్రాంతాల్లో పోలీసులు ట్రాఫిక్ ఆంక్షలు విధించారు. మధ్యాహ్నం 2 గంటల నుండి రాత్రి 7 గంటల వరకు సైబరాబాద్ లో పలుచోట్ల ట్రాఫిక్ ఆంక్షలు కొనసాగనున్నాయి. గచ్చిబౌలి నుంచి లింగంపల్లి రోడ్డు వరకు ఆంక్షలు అమల్లో ఉంటాయని, వాహనదారులు ప్రత్యామ్నాయ మార్గాలలో వెళ్లాలని పోలీసులు సూచించారు.