రాఖీ రోజు అన్నకు మర్చిపోలేని బహుమతి
అన్నాచెల్లెళ్లు, అక్కా తమ్ముళ్ల ప్రేమానురాగాలకు చిహ్నం ‘రక్షా’బంధన్‌! సామాన్యుల నుంచి సెలబ్రిటీల వరకు ప్రతీ ఒక్కరికీ రాఖీ ఓ భావోద్వేగం. ఎంత బిజీగా ఉన్నా అక్కాచెల్లెల్లు, తమ అన్నా తమ్ముళ్లకు రాఖీలను కట్టి కలకాలం వారి బంధం ఇలాగే నిలవాలని కోరుకుంటారు. నిజానికి రాఖీ పండుగ రోజు సోదరీమణులు తమ సోదరులకు రాఖీలు కడితే సోదరులు బహుమతులు ఇస్తుంటారు. కానీ ఈ సోదరి మాత్రం అందరి కంటే భిన్నం. తన సోదరుడికి ఈ రాఖీ పండుగ రోజు ప్రపంచంలో ఏ సోదరి ఇవ్వనటువంటి అత్యంత విలువైన బహుమతిని ఇచ్చింది. కాదు కాదు తన అన్నకు ఓ జీవితాన్ని ప్రసాదించింది.
చత్తీస్‌గఢ్‌ రాయ్పూర్లో ఉంటున్న ఓంప్రకాష్ ధంగర్ గత కొంతకాలంగా కిడ్నీ వ్యాధితో బాధపడుతున్నారు. అతని రెండు కిడ్నీలు దాదాపు 90 శాతం పాడవటంతో డయాలసిస్ చేయాల్సిన సీరియస్ కండీషన్లో ఉన్నారు. దీంతో అతని సర్జరీ చేయించాలనుకున్నారు కుటుంబసభ్యులు. డాక్టర్లు దాతలు కావాలని చెప్పడంతో చాలా చోట్ల ప్రయత్నాలు చేశారు. కానీ ఎవరూ ముందుకు రాలేదు. ఈ క్రమంలో తిక్రపారాలో ఉంటున్న ఓంప్రకాష్ సోదరి షీలాబాయి కిడ్నీ ఇచ్చేందుకు ముందుకు వచ్చింది. దీంతో సోదరుడి సంతోషానికి అవధులు లేకుండా పోయాయి. ఈ రాఖీకి కిడ్నీ దానం చేసి తన సోదరుడికి కొత్త జీవితాన్ని ప్రసాదించాలనుకుంది.
ప్రస్తుతం డాక్టర్లు షీలాబాయికి సర్జరీ నిమిత్తం అన్ని టెస్టులు చేశారు. ఆమె కిడ్నీ తన సోదరుడికి మ్యాచ్‌ అవుతుందని తెలిపింది. దీంతో ఎలాంటి ఆలస్యం చేయకుండా కిడ్నీ ట్రాన్స్ప్లాంటేషన్ను వెంటనే చేయాలని డిసైడ్ అయ్యారు. సెప్టెంబర్‌ 3వ తేదీన గుజరాత్‌లో ఓంప్రకాష్కు కిడ్నీ మార్పిడి శస్త్రచికిత్స చేసేందుకు అన్నీఏర్పాట్లు చేస్తున్నారు. ఈ నేపథ్యంలో కిడ్నీ మార్పిడికి వారం ముందు షీలాబాయి తన అన్నకు రాఖీ కట్టింది. తన సోదరుడు ఆయురారోగ్యాలతో జీవించాలనే కోరుకుంది. రాఖీకి ఇంతకంటే మంచి బహుమతి ఏమి ఇవ్వగలను అంటూ తన ఆనందాన్ని వ్యక్తం చేసింది.
