విచిత్రం.. అడవి బాతుల్లాగా అరుస్తున్న 'కొత్త' కప్పలు

ప్రకృతిలో ఎన్నో వింతలు, విశేషాలు. ఈ భూ ప్రపంచంలో ఆశ్చర్యాన్ని కలిగించే వింత జీవులున్నాయి. కొన్ని సార్లు శాస్త్రవేత్తల పరిశీలన సమయంలో వెలుగులోకి వచ్చే జీవులను గురించి తెలిస్తే.. ఆశ్చర్యపోకతప్పదు. తాజాగా అడవి బాతుల్లాగా అరిచే కొత్త జాతి కప్పలను కనుగొన్నారు శాస్తవేత్తలు. వీటి ప్రత్యేకత ఏమిటంటే.. ఆడ, మగ కప్పలు రెండూ చప్పుడు చేస్తాయి. అరుణాచల్‌ ప్రదేశ్‌లోని బ్రహ్మపుత్ర (స్థానిక నామం దిహాంగ్‌) నదీతీరంలో కనుగొన్న ఈ కొత్త కప్పలకు ‘మ్యూజిక్‌ ఫ్రాగ్‌’ అని పేరు పెట్టారు. వీటి ప్రత్యేకత ఏమిటంటే.. ఆడ, మగ కప్పలు రెండూ చప్పుడు చేస్తాయి.

‘‘నిదిరానా జాతికి చెందిన ఈ కొత్తజాతి కప్పలు రెండు మూడు రకాల చప్పుళ్లతో ప్రత్యేకమైన శబ్ద వ్యవస్థను కలిగి ఉంటాయి. బ్రహ్మపుత్ర నదీతీరంలో మొదటిసారిగా వీటి చప్పుళ్లు విన్నాం. అడవి బాతుల శబ్దాన్ని పోలి ఉన్న ఆ చప్పుడును గతంలో ఎప్పుడూ వినలేదు. 'గుండ్రని' ముక్కు మరియు 'మృదువైన' చర్మాన్ని కలిగి ఉండే ఈ కప్పల వెనుక భాగంలో ఎముకలు పొడుచుకు వస్తాయి. ’’ అని సైన్స్‌ పత్రిక జూటాక్సాలో శాస్త్రవేత్తలు రాశారు. అరుణాచల్‌ రాష్ట్రంలో గతేడాది ఆగస్టు, సెప్టెంబరు నెలల్లో తాము సర్వే నిర్వహించామని, ఆ సందర్భంగా ఈ కొత్తజాతి కప్పలను కనుగొన్నట్లు శాస్త్రవేత్తలు బిటుపన్‌ బోరువా, వి.దీపక్‌, అభిజిత్‌ దాస్‌ తెలిపారు. 6 సెం.మీ. మేర పెరిగే ఈ కప్పలకు దేహం మధ్యలో లేత క్రీం రంగులో గీత ఉంటుందన్నారు.