మాజీ ముఖ్యమంత్రి కుమార స్వామి సంచలన వ్యాఖ్యలు
దేశ వ్యాప్తంగా మరోసారి మహారాష్ట్ర రాజకీయాలు వార్తల్లో నిలిచాయి. ఎన్సీపీని వీడిన అజిత్ పవార్ షిండే ప్రభుత్వంలో చేరడం సంచలనం సృష్టిస్తోంది. ఇప్పటికే ఉప ముఖ్యమంత్రిగా దేవేంద్ర ఫడణవీస్‌ ఉండగా.. రెండో డిప్యూటీ సీఎంగా అజిత్ పవార్.. బాధ్యతలు స్వీకరించారు. ఇంక ముందు ముందు కూడా మహా రాజకీయాల్లో మరిన్ని పెరుమార్పులు చోటుచేసుకోనున్నట్లు వార్తలు వస్తున్నాయి. తాజా రాజకీయాలపై కర్ణాటక మాజీ ముఖ్యమంత్రి, జేడీఎస్ అగ్ర నేత.. హెచ్డీ కుమార స్వామి సంచలన వ్యాఖ్యలు చేశారు.
త్వరలోనే కర్ణాటకలో ఓ అజిత్ పవార్ పుట్టుకొస్తారని కుమార స్వామి అనుమానం వ్యక్తం చేశారు. మహారాష్ట్రలో శరద్ పవార్కు అజిత్ పవార్ టోపి పెట్టినట్లే కర్ణాటకలో కూడా జరిగే అవకాశం ఉందని వ్యాఖ్యానించారు. రాజకీయాల్లో ఏమైనా జరగొచ్చని చెప్పారు. కర్ణాటక రాజకీయాల్లో నవంబర్లో కుదుపులు వస్తాయని చాలా మంది నాయకులు చెప్తున్నారని ఇది నిజమయ్యే అవకాశం ఉందని కుమారస్వామి అభిప్రాయపడ్డారు. ఎవరు అజిత్ పవార్ అవుతారో, ఏం జరుగుతుందో వేచి చూద్దామని వివరించారు. ప్రస్తుతం కుమార్ స్వామి వ్యాఖ్యలు కర్ణాటకలో చర్చనీయాంశంగా మారాయి.
