ఆటో డ్రైవర్ అత్యుత్సాహం.. ఆపుకోలేక పైకి ఎక్కించాడు
ట్రాఫిక్‌లో ఆటో నిలిచిపోతే.. సిగ్నల్ పడేవరకూ వెయిట్ చెయ్యాలి. అంతే కానీ.. ఫుట్‌పాత్‌ల మీద అడ్డగోలుగా నడిపితే తర్వాతి పరిణామాలు ఎదుర్కోవాల్సి ఉంటుంది. తాజాగా, ఓ ఆటో డ్రైవర్ అదే పని చేసి చివరకు పోలీసులకు అడ్డంగా బుక్కయ్యాడు. ఇందుకు సంబంధించిన వీడియో చూసిన నెటిజన్లు.. ‘‘ఇదెక్కడి డ్రైవింగ్‌రా బాబోయ్’’.. అని కామెంట్లు చేస్తున్నారు. ఢిల్లీలోని (Delhi) హమ్దర్ద్ నగర్ రెడ్ లైట్ సంగమ్ విహార్ ట్రాఫిక్ సర్కిల్ వద్ద ఈ ఘటన చోటు చేసుకుంది.
ఢిల్లీలోని విహార్ ట్రాఫిక్ సర్కిల్ వద్ద ఆదివారం కూడా ట్రాఫిక్ జామ్ అయింది. దీంతో వాహనాలు కిలోమీటర్ల మేర బారులు తీరాయి. ఈ క్రమంలో ట్రాఫిక్‌లో గంటల తరబడి వేచి చూసిన.. ఆటో డ్రైవర్ ఎలాగైనా అక్కడి నుంచి వెళ్లిపోవాలని అనుకున్నాడు. అయితే అది సాధ్యం కాకపోవడంతో చివరికి ఏకంగా ఫుట్ ఓవర్ బ్రిడ్జి పైకే (Foot over bridge) ఎక్కించేశాడు. పక్కన ఉన్న వారి సాయంతో ముందుగా మెల్లగా ఆటోను మెట్ల పైకి ఎక్కించేశాడు. తర్వాత క్రమ క్రమంగా స్పీడు పెంచుతూ బ్రిడ్జి పైకి వెళ్లిపోయాడు.
#delhi : 😲 Autowala Took His auto in Foot over bridge to avoid traffic in Delhi. #viralvideo pic.twitter.com/5tcJN2C2oY
— Bored Journalist (@boredjourno) September 3, 2023
అయితే ఆ సమయంలో ఎవరైనా బ్రిడ్జ్ మీద వస్తుంటే పెద్ద ప్రమాదమే జరిగేది. ఆటో డ్రైవర్ ఇలా చేయడంతో అక్కడ ఉన్న వారందరూ ఆశ్చర్యంతో చూస్తూ ఉండిపోయారు. కొందరు ఈ ఘటనను తమ ఫోన్లలో రికార్డు చేశారు. ఈ వీడియో ప్రస్తుతం నెట్టింట తెగ వైరల్ అవుతోంది. దీనిపై నెటిజన్లు ఫన్నీ ఫన్నీ కామెంట్లు చేస్తున్నారు. ‘‘అది ఆటో అనుకున్నావా.. లేక హెలీకాప్టర్ అనుకున్నావా’’.. అని కొందరు కామెంట్లు చేస్తున్నారు. చివరకు ఈ వీడియో పోలీసుల కంటిలో పడింది. ఆటో నంబర్ ఆధారంగా వివరాలు సేకరించిన పోలీసులు ఆ యువకుడిని అరెస్ట్ చేశారు.
