మోడీ హయాంలో మహిళల హైట్ రెండు ఇంచులు పెరిగింది - ఓపీ ధన్కర్

నరేంద్ర మోడీ అధికారం చేపట్టి 9 ఏండ్లు పూర్తైన సందర్భంగా బీజేపీ దేశవ్యాప్తంగా పలు కార్యక్రమాలు నిర్వహిస్తోంది. మోడీ పాలనలో జరిగిన అభివృద్ధి, సాధించిన విజయాలను ప్రజలకు వివరిస్తోంది. ఇందులో భాగంగా హర్యానాలో నిర్వహించిన బహిరంగ సభలో పాల్గొన్న ఆ రాష్ట్ర బీజేపీ చీఫ్ ఓపీ ధన్కర్ చిత్రమైన వ్యాఖ్యలు చేశారు. ప్రస్తుతం ఆ కామెంట్లు సోషల్ మీడియాలో వైరల్ అయ్యాయి.

మోడీ ప్రభుత్వ హయాంలో మహిళల హైట్ పెరిగిందని ధన్కర్ అన్నారు. ప్రభుత్వం గ్రామీణ ప్రాంతాల్లో సౌకర్యాలు మెరుగుపరచడంతోనే అది సాధ్యమైందని చెప్పారు. 9 ఏండ్లుగా మోడీ ప్రభుత్వం తీసుకుంటున్న చర్యల ఫలితంగా మహిళల ఎత్తు పెరిగిందని, తన సొంత అక్కాచెల్లెళ్ల హైట్ కూడా పెరిగిందని అన్నారు. సిర్సాలో జరిగిన సభలో ఆయన ఈ వ్యాఖ్యలు చేశారు.

తన వ్యాఖ్యలకు ధన్కర్ విచిత్రమైన లాజిక్ చెప్పారు. గతంలో మహిళలు కిలోమీటర్లు దూరం వెళ్లేవారని, తలపై నీళ్ల బిందెలను మోసేవారని అన్నారు. ఇక వంట కోసం అవసరమైన పిడకల కోసం గంపల్లో పెండను తలపై తెచ్చేవారని చెప్పారు. ఫలితంగా వారు ఎత్తు పెరిగేవారుకాదని కానీ మోడీ అధికారం చేపట్టాక ఇంటింటికీ మంచినీళ్లు, వంట గ్యాస్ అందిస్తున్నారని, దీంతో వారికి ఆ బాధలు తప్పి రెండు ఇంచుల మేర ఎత్తు పెరిగిందని ధన్కర్ చెప్పారు. ఆయన చేసిన కామెంట్లు సోషల్ మీడియాలో వైరల్గా మారడంతో నెటిజన్లు ఫన్నీగా రియాక్ట్ అవుతున్నారు.