ఆసీస్ స్టార్కు ఘోర అవమానం.. టీజ్ చేసిన ఇంగ్లండ్ ఫ్యాన్స్

క్రికెట్ లో భారత్, పాకిస్థాన్ మ్యాచ్ కు ఎంత క్రేజ్ ఉంటుందో.. అంతే క్రేజ్ ఆస్ట్రేలియా, ఇంగ్లండ్ జట్ల మధ్య జరిగే యాషెస్ సిరీస్ కూ ఉంటుంది. ఈ మహా సమరాన్ని ప్రపంచం ఆసక్తిగా చూస్తుంది. ఈ సిరీస్ లో విజయాన్ని ఇరు జట్లు గర్వంగా భావిస్తారు. ఆ గెలుపు కోసం ఇరు జట్లు తమ సర్వశక్తులా కష్టపడతారు. ఈ పోరులో ఆటగాళ్ల మధ్య ఎంత ఫైర్ ఉంటుందో.. అంతకంటే ఎక్కువ ప్రేక్షకుల మధ్య ఉంటుంది. ఏ చిన్న అవకాశం దొరికినా అవతలి జట్టు ఆటగానికి ఓ ఆట ఆడుకుంటారు. తమ మాటలు, చేష్టలతో ఆటగాడి ఆత్మవిశ్వాసాన్ని దెబ్బతీస్తారు. ఈ క్రమంలో ఆసీస్ ఆటగాడు స్టీవ్ స్మిత్ కు ఓ చేదు అనుభవం ఎదురైంది. 2018లో బాల్ ట్యాంపరింగ్ చేసి.. సస్పెండ్ అయిన స్మిత్, మీడియా ముందు మాట్లాడుతూ ఏడ్చాడు.

ఈ విషయాన్ని బయటికి తీసిన ఇంగ్లండ్ ఫ్యాన్స్.. నాలుగో రోజు గేమ్ లో బౌండరీ దగ్గర ఫీల్డింగ్ చేస్తున్న స్మిత్ ను ఎగతాళి చేశారు. ‘వి సా యూ క్రైయింగ్ ఆన్ ది టెల్లీ’ (నువ్వు ఏడవటం మేము టీవీలో చూశాం) అంటూ దారుణంగా అవమానించారు. దీనికి స్పందించి స్మిత్ అభిమానుల వైపు చూస్తూ.. పైకి నవ్వుతూ ఇంకా గట్టిగా పాడండి అన్నట్లు తల ఆడించాడు. ఆ టైంలో అతను ఎంత ఇబ్బంది పడ్డాడో స్మిత్ ముఖంలో స్పష్టంగా కనిపించింది. దానికి సంబంధించిన వీడియో సోషల్ మీడియాలో వైరల్ అవుతోంది. ఇంగ్లండ్ ఫ్యాన్స్ చేసిన తీరును కొంతమంది తప్పుబడుతున్నారు.