తీవ్ర అనారోగ్యం.. మూడో టెస్టుకు ముందు 10కిలోల బరువు తగ్గిన పడిక్కల్
స్టార్ బ్యాటర్ కేఎల్ రాహుల్ గాయం తిరగబడింది. దీంతో అతను మిగతా మూడు మ్యాచులకు దూరమైనట్లు బీసీసీఐ ప్రకటించింది. రాహుల్ స్థానంలో యువ బ్యాటర్ దేవ్ దత్ పడిక్కల్ ను జట్టులోకి తీసుకోనున్నట్లు తెలుస్తుంది. కాగా ఈ నెల 15 నుంచి రాజ్ కోట్ వేదికగా జరగనున్న మ్యాచ్ లో పడిక్కల్ అరంగేట్రం చేయనున్నాడు. ఈ సందర్భంగా మాట్లాడిన పడిక్కల్ టెస్టుల్లో ఆడటం తన కల అని చెప్పాడు. అనారోగ్యం కారణంగా గత సీజన్ లో తీవ్రంగా ఇబ్బంది పడినట్లు చెప్పుకొచ్చాడు. పొత్త కడుపు సమస్యతో ఇబ్బంది పడుతూనే 2022-23 సీజన్ లో ఆడానన్నాడు. ఆ సమయంలో తరచూ అనారోగ్యం బారిన పడటం వల్ల 10 కిలోల బరువు తగ్గినట్లు చెప్పుకొచ్చాడు.
‘టెస్టు జట్టుకు పిలువు రావడాన్ని నేను ఇప్పటికీ నమ్మలేకపోతున్నా. కెరీర్ లో చాలా కఠినమైన సవాళ్లను ఎదుర్కొన్నాక నాకు ఈ అవకాశం వచ్చింది. నా శ్రమ ఫలించినందుకు సంతోషంగా ఉంది. అనారోగ్యం నుంచి కోలుకుని ఫిట్ నెస్ సాధించడం సవాల్ గా మారింది. ఈ క్రమంలో ఏకంగా 10 కిలోల బరువు తగ్గాను. మంచి ఫుడ్ తీసుకుంటూ.. ఫిట్ నెస్ సాధించేందుకు కృషి చేశా’అని పడిక్కల్ చెప్పుకొచ్చాడు. ప్రస్తుతం జరుగుతున్న రంజీ ట్రోఫీలో.. కర్ణాటక-తమిళనాడు మధ్య జరిగిన మ్యాచులో తొలి ఇన్నింగ్స్ లో 151, రెండో ఇన్నింగ్స్ లో 36 పరుగులు చేశాడు. గతంలో ఇండియా ఏ తరుపున హాఫ్ సెంచరీ సాధించాడు. గతేడాది టీ20ల్లో అరంగేట్రం చేసిన పడిక్కల్.. రెండు మ్యాచుల్లో 38 పరుగులు మాత్రమే చేశాడు.
