India vs SA : భారత్‌కు సఫారీల షాక్.. సెంచరీతో చెలరేగిన జోర్జి
టీమిండియాకు సఫారీలు షాకిచ్చారు. మూడు వన్డేల సిరీస్లో భాగంగా గబెరా వేదికగా జరిగిన రెండో వన్డేలో సఫారీలు 8 వికెట్ల తేడాతో గెలిచారు. 212 పరుగుల స్వల్ప లక్ష్యాన్ని దక్షిణాఫ్రికా జట్టు 42.3 ఓవర్లలో రెండే వికెట్లు కోల్పోయి ఛేదించింది.ఓపెనర్లు రిజా హెండ్రిక్స్ టోనీ డీ జోర్జి (119*) (122 బంతుల్లో 119 నాటౌట్‌; 9 ఫోర్లు, 6 సిక్స్‌లు) సెంచరీతో చెలరేగాడు. మరో ఓపెనర్ రిజా హెండ్రిక్స్ (52) హాఫ్ సెంచరీ బాదాడు. వాండర్ డసెన్ (36) రాణించాడు. తొలి మ్యాచ్లో సఫారీలను బెంబేలెత్తించిన భారత బౌలర్లు ఈమ్యాచ్‌లో తేలిపోయారు. అర్ష్‌దీప్‌, రింకు సింగ్‌ తలో వికెట్ తీశారు. ఈ మ్యాచ్లో సౌతాఫ్రికా విజయం సాధించడంతో సిరీస్ 1-1 సమం అయింది. తొలి మ్యాచ్లో భారత్ విజయం సాధించిన సంగతి తెలిసిందే. సిరీస్ నిర్ణయాత్మక పోరు గురువారం (డిసెంబరు 21న) జరుగనుంది.
తొలుత బ్యాటింగ్కు దిగిన టీమ్ఇండియా 46.2 ఓవర్లలో 211 పరుగులు చేసి ఆలౌట్‌ అయింది. తొలి బంతికే బౌండరీ బాదిన రుతురాజ్‌ గైక్వాడ్‌ ఆ తర్వాతి బంతికి ఔటై పెవిలియన్ బాట పట్టాడు. ఆ తర్వాత వచ్చిన తిలక్‌ వర్మ (10) కూడా అవుట్ అయ్యాడు. 46 పరుగులకే 2 వికెట్లు కోల్పోయిన భారత జట్టును సాయి సుదర్శన్, కేఎల్ రాహుల్‌లు ఆదుకున్నారు. నెమ్మదిగానే బ్యాటింగ్ చేస్తూ స్కోరుబోర్డును నడిపించారు. అలా మూడో వికెట్‌కు 68 పరుగులు జోడించారు. హాఫ్ సెంచరీ చేసిన సాయి (83 బంతుల్లో 62; 7 ఫోర్లు, 1 సిక్స్‌) 27వ ఓవర్లో ఔటయ్యాడు. ఈ ఇద్దరు తప్ప ఇంకెవరూ కనీసం 20 పరుగులైన చేయలేకపోయారు.
ఆ తర్వాత మైదానంలోకి దిగిన సంజూ శాంసన్‌ 12 పరుగులు చేసి పెవిలియన్ చేరుకున్నాడు. కెరీర్లో తొలి వన్డే ఆడుతున్న రింకూ సింగ్‌ (17) కూడా ఈ మ్యాచ్లో అంతగా ఆకట్టుకోలేకపోయాడు. అక్షర్‌ పటేల్‌ (7), కుల్‌దీప్‌ యాదవ్‌ (1) కూడా మెరుపులు మెరిపించలేకపోయారు. ఆఖరిలో అర్ష్‌దీప్‌ సింగ్‌ (18) కాస్త బ్యాటుకు పని చెప్పి టీమ్ఇండియాను 200 మార్క్ను దాటించాడు. సౌతాఫ్రికా బౌలర్లలో నండ్రి బర్గర్ 3, బ్యురాన్ హెండ్రిక్స్ 2, కేశవ్‌ మహరాజ్‌ 2, లిజాడ్ విలియమ్స్‌, మార్‌క్రమ్‌ ఒక్కో వికెట్ పడగొట్టారు. మరోవైపు, ఈ మ్యాచ్లో 2023లో 1000 పరుగులు పూర్తి చేసిన ఆటగాడిగా నిలిచాడు.
