హైదరాబాద్‌ క్రికెట్‌ అసోసియేషన్‌ అధ్యక్షుడిగా జగన్‌..

హైదరాబాద్‌ క్రికెట్‌ అసోసియేషన్‌ అధ్యక్షుడిగా జగన్‌ మోహన్‌రావు ఎన్నికయ్యారు. యునైటెడ్‌ మెంబర్స్‌ ఆఫ్‌ హెచ్‌సీఏ ప్యానెల్‌ తరుపున పోటీ చేసిన ఆయన ప్రత్యర్థి అమర్నాథ్‌పై ఒక్క ఓటు తేడాతో గెలిచారు. జగన్‌మోహన్‌ రావుకు 63 ఓట్లు రాగా అమర్‌నాథ్‌కు 62 ఓట్లు వచ్చాయి. ఈ క్రమంలో రీకౌంటింగ్ జరపాలని అమర్నాథ్ కోరగా రిటర్నింగ్ ఆఫీసర్ రీకౌంటింగ్ చేపట్టారు. ఇందులోనూ జగన్ మోహన్ గెలిపొందారు.

హెచ్‌సీఏ ఉపాధ్యక్షుడిగా దల్జిత్‌ సింగ్ (గుడ్‌ గవర్నెన్స్‌ ప్యానెల్‌), సెక్రటరీగా దేవరాజు (క్రికెట్‌ ఫస్ట్‌ ప్యానెల్‌), జాయింట్‌ సెక్రటరీగా బసవరాజు (గుడ్‌ గవర్నెన్స్‌ ప్యానెల్‌), కోశాధికారిగా సీజే శ్రీనివాసరావు, (యునైటెడ్‌ మెంబర్స్‌ ప్యానెల్‌), కౌన్సిలర్‌గా సునీల్‌ అగర్వాల్‌ (క్రికెట్‌ ఫస్ట్‌ ప్యానెల్‌) గెలుపొందారు. ఎన్నో వివాదాల తర్వాత హెచ్‌సీఏ ఎన్నికలు జరిగాయి. ఇవాళ ఉదయం 10 గంటల నుంచి మ‌ధ్యాహ్నం 3 గంటల వరకు పోలింగ్ జరిగింది. మొత్తం 173 మంది సభ్యులకు గాను 169 మంది ఓటు హక్కు వినియోగించుకున్నారు.