Diamond League Finals: రెండో స్థానంతో సరిపెట్టుకున్న నీరజ్ చోప్రా
భారత స్టార్‌ జావెలిన్‌ త్రో అథ్లెట్‌ నీరజ్ చోప్రా ప్రతిష్ఠాత్మక డైమండ్‌ లీగ్‌లో రెండో స్థానంలో నిలిచాడు. ఈ పోటీల్లో చెక్‌ రిపబ్లిక్‌కు చెందిన జాకబ్ వాద్లెచ్ ఛాంపియన్‌గా నిలిచాడు. అమెరికా వేదికగా శనివారం జరిగిన టైటిల్ మ్యాచ్‌లో నీరజ్ జావెలిన్‌ను 83.80 మీటర్లు విసిరి రెండో స్థానాన్ని దక్కించుకున్నాడు. మొదటి, నాలుగు ప్రయత్నాల్లో ఫెయిల్ అయిన నీరజ్... తన రెండో ప్రయత్నంలో విసిరిన దూరంతో ఈ స్థానంలో నిలిచాడు. మూడు, ఐదు, ఆరు ప్రయత్నాల్లో వరుసగా 81.37, 80.74, 80.90 మీటర్ల దూరం ఈటెను విసిరాడు.విజేతగా నిలిచిన చెక్‌ రిపబ్లిక్‌ ప్లేయర్ జాకబ్ వాద్లెచ్ తన చివరి ప్రయత్నంలో 84.24 మీటర్ల అత్యుత్తమ త్రోను వేశాడు. దీంతో టైటిల్‌ను గెలుచుకున్నాడు.
ఇక ఫిన్లాండ్‌కు చెందిన ఆలివర్ హెలాండర్ 80.90 మీటర్లు విసిరి మూడో స్థానాన్ని దక్కించుకున్నాడు. ఈ సీజన్‌లో అత్యుత్తమ ఫామ్‌లో ఉన్న నీరజ్ చోప్రా మరోసారి విజేతగా నిలుస్తాడని అందరూ భావించారు. కానీ ఈసారి కాస్త నిరాశ ఎదురైంది. గత ఏడాది జ్యురిచ్‌లో జరిగిన డైమండ్‌ లీగ్‌లో.. నీరజ్ బంగారు పతకం సాధించిన సంగతి తెలిసిందే. మొదటిసారి ప్రపంచ అథ్లెటిక్స్ ఛాంపియన్‌షిప్ టైటిల్‌ను గెలుచుకున్నాడు. ఇక ఈసారి డైమండ్‌ లీగ్‌లో రెండో స్థానంలో నిలిచిన నీరజ్‌కు 12 వేల డాలర్ల ప్రైజ్ మనీ ఇవ్వనున్నారు. టైటిల్ నెగ్గిన జాకబ్ వాద్లెచ్కు 30 వేల డాలర్ల నగదు బహుమతి దక్కనుంది.
World and Olympic Champion Neeraj Chopra finishes second at the Diamond League Final 2023!
— Pulkit Trigun (@PulkitTrigun45) September 16, 2023
- Congrats Champ...!!! #NeerajChopra #EugeneDL #Athletics #SKIndianSportspic.twitter.com/s21NTIK9nr
