IND vs ENG: తేరుకున్న టీమిండియా.. ఇంగ్లాండ్ టార్గెట్ ఎంతంటే..?
9, 0, 4, 8.. ఇవి టీమిండియా టాప్ బ్యాటర్ల స్కోర్. ఈ మ్యాచ్ లో నెగ్గి.. టీ20 వరల్డ్ కప్ సెమీ ఫైనల్ లో ఓడించిన ఇంగ్లాండ్ పని పడతారు. వరుస విజయాలతో ఈ వరల్డ్ కప్ సెమీస్ కు అర్హత సాధిస్తారు అనుకుంటే.. 11 ఓవర్లలోపే ఎదురుదెబ్బ తగిలింది. టోర్నీలో పేలవ ప్రదర్శన చేసి.. ఒకే ఒక విజయంతో పాయింట్స్ టేబుల్ లో చివరి స్థానంలో ఉన్న ఇంగ్లాండ్.. ఆరంభంలో టీమిండియాకు షాక్ ఇచ్చింది. వెంటవెంటనే వికెట్లు పడగొట్టి భారత్ కు కోలుకోలేని దెబ్బకొట్టింది. దాంతో 50 పరుగుల్లోపు భారత్ 3 కీలక వికెట్లు కోల్పోయింది. ఇంగ్లాండ్ బౌలర్ల దాటికి పరుగులు చేయడానికి ఇబ్బంది పడ్డారు. గిల్ (9), కోహ్లీ డకౌట్, శ్రేయస్ (4) ఫెయిల్ అవడంతో పీకల్లోతు కష్టాల్లో పడింది. కీలక సమయంలో క్రీజులోకి వచ్చిన జడేజా (8) కూడా చేతులెత్తేశాడు.
కానీ, రోహిత్ శర్మ (87, 101 బంతుల్లో, 10 ఫోర్లు, 3 సిక్సర్లు) కెప్టెన్ ఇన్నింగ్స్ ఆడటంతో భారత్ చెప్పుకోదగ్గ స్కోర్ చేసింది. నిర్ణీత 50 ఓవర్లలో 9 వికెట్ల నష్టానికి 229 పరుగులు చేసింది. రోహిత్ శర్మకు కేఎల్ రాహుల్ (39, 58 బంతుల్లో), సూర్యకుమార్ యాదవ్ (49, 47 బంతుల్లో) సమయోచిత ఇన్నింగ్స్ ఆడటంతో.. టీమిండియా 229 పరుగులు చేయగలిగింది. చివర్లో బుమ్రా 16 పరుగులు జోడించాడు. ఇంగ్లాండ్ బౌలర్లలో డేవిడ్ విల్లీ 3 వికెట్లు తీసుకోగా.. క్రిస్ వోక్స్, అడిల్ రషిద్ చెరో రెండు వికెట్లు పడగొట్టారు. మార్క్ ఉడ్ ఒక వికెట్ తీసుకున్నాడు.
