షావోమీ కొత్త ట్యాబ్లెట్.. బడ్జెట్ ధరలో హైఎండ్ ఫీచర్స్

మార్కెట్ ఎన్ని బ్రాండ్స్ ఉన్నా.. షావోమీకి సపరేట్ ఫ్యాన్ బేస్ ఉంది. తక్కువ ధరతో.. హైఎండ్ ఫీచర్స్ తో ప్రొడక్ట్స్ తీసుకొస్తుంటుంది. ఇప్పుడు మరో కొత్త ప్రొడక్ట్ ను లాంచ్ చేసింది. షావోమీ ప్యాడ్ 5కి అప్ గ్రేడెడ్ వెర్షన్.. షావోమీ ప్యాడ్ 6ని లాంచ్ చేసింది. ట్యాబ్ తో పాటు కీబోర్డ్, స్మార్ట్ పెన్, కేస్ ను కూడా తీసుకొచ్చింది. అంతేకాకుండా రెడ్ మీ బడ్స్ యాక్టివ్ 4 పేరిట ఇయర్ బడ్స్ ను కూడా లాంచ్ చేసింది.

షావోమీ ప్యాడ్ 6 మెటల్ డిజైన్ తో వస్తుంది. 144 హెడ్జ్ రీఫ్రెష్ రేట్ తో.. 11 అంగుళాల 2.8k ఎల్ సీడీ డిస్ ప్లే తో వస్తున్న ఈ ట్యాబ్.. 490 గ్రాముల బరువు ఉంటుంది. కార్నింగ్ గొరిల్లా గ్లాస్ 3 ప్రొటెక్షన్, హెచ్ డీఆర్10+, డాల్బీ విజన్ ఫీచర్స్ ఇందులో ఉన్నాయి. ఆండ్రాయిడ్ 13 ఆపరేటింగ్ సిస్టమ్ తో, స్నాప్ డ్రాగన్ 870 ప్రాసెసర్ తో రాబోతోంది. ఇందులో 13 ఎంపీ రియర్ కెమెరా, 8 ఎంపీ ఫ్రంట్ ఫేసింగ్ కెమెరా కలిగి ఉంది.

33 వాట్ ఛార్జింగ్ సపోర్ట్ తో 8,840 ఎంఏహెచ్ బ్యాటరీ కెపాసిటీతో లాంచ్ అయింది. 100 నిమిషాల్లో 0 టు 100 ఛార్జ్ చేయొచ్చు. ఒకసారి ఫుల్ ఛార్జ్ చేస్తే రెండు రోజుల పాటు వాడుకోవచ్చని షావోమీ తెలిపింది. 6 జీబీ ర్యామ్+128 జీబీ మెమరీ వేరియంట్ ధర రూ. 26,999 కాగా.. 8జీబీ+ 256 జీబీ ధర రూ. 28,999 ఉంది. లాంచ్ ఆఫర్ కింద ఐసీఐసీఐ కార్డ్స్ పై భారీ డిస్కౌంట్స్ కూడా ఇస్తున్నారు. జూన్ 11 నుంచి మార్కెట్ లో అందుబాటులో ఉంటుంది.