Lava Yuva 3 : రూ.7 వేలలోపే అదిరిపోయే ఫోన్.. 'లావా' కొత్త మొబైల్ లాంచ్
(Lava Yuva3) ప్రముఖ మొబైల్ తయారీ కంపెనీ లావా సరికొత్త ఫోన్‌ను మార్కెట్లోకి విడుదల చేసింది. ఇప్పటికే లావా యువ2, లావా యువ3 ప్రో పేర్లతో తీసుకొచ్చిన ఫోన్లకు మార్కెట్లో మంచి డిమాండ్ ఉంది. ఆ మోడల్ మొబైల్స్ యువతను బాగా ఆకట్టుకున్నాయి. ఈ నేపథ్యంలో లావా యువ 3 మొబైల్‌ను లావా కంపెనీ మార్కెట్లోకి లాంచ్ చేసింది. ఈ ఆండ్రాయిడ్ ఫోన్ అద్భుతమైన ఫీచర్లలో అందుబాటులోకి వచ్చింది. ఇందులో 5000mAh బ్యాటరీ ఉంది. అలాగే 18wతో ఫాస్ట్ ఛార్జింగ్ సదుపాయం ఉంది.
లావా కంపెనీ లాంచ్ చేసిన కొత్త మొబైల్ రెండు వేరియంట్లలో లభించనుంది. అందులో 4 జీబీ + 64 జీబీ వేరియంట్ మొబైల్ ధరను రూ.6,799గా నిర్ణయించింది. రూ.7 వేలలోపే లభించే ఈ ఫోన్ యువతను ఎక్కువగా ఆకర్షించనుంది. అదేవిధంగా 4 జీబీ + 128 జీబీ వేరియంట్‌లో లభించే ఫోన్ ధరను రూ.7,299గా కంపెనీ నిర్ణయించింది. ఈ రెండు వేరియంట్ల ఫోన్లు మూడు రంగుల్లో లభించనున్నాయి. ఎక్లిప్స్ బ్లాక్, కాస్మిక్ లావెండర్, గెలాక్సీ వైట్ రంగులల్లో ఈ మొబైల్స్ ఉన్నాయి.
ఫిబ్రవరి 7వ తేది నుంచి అమెజాన్‌లో లావా యువ 3 మొబైల్స్ విక్రయాలు ప్రారంభమవుతాయని కంపెనీ ప్రకటించింది. అదేవిధంగా ఫిబ్రవరి 10వ తేది నుంచి లావా ఇ-స్టోర్‌తో పాటుగా ఇతర రిటైల్ దుకాణాల్లో ఈ స్మార్ట్ ఫోన్లు అందుబాటులో ఉంటాయి. లావా యువ 3 ఫోన్‌లో 6.5 అంగుళాల హెచ్‌డీ డిస్‌ప్లే ఉంది. అది 90Hz రిఫ్రెష్ రేటుతో పనిచేయనుంది. ఆండ్రాయిడ్ 13తో ఈ ఫోన్ వస్తుండగా దానిని ఆండ్రాయిడ్ 14కు అప్‌గ్రేడ్ చేసుకోవచ్చని కంపెనీ తెలిపింది. ట్రిపుల్ కెమెరాతో ఏఐ, వీజీఏ కెమెరా సెన్సార్లు ఉన్నాయి. వీడియో కాల్స్, సెల్ఫీల కోసం ముందు భాగంలో 5 ఎంపీ కెమెరాను అమర్చారు.
