KCR : రేపు తెలంగాణ భవన్ కు కేసీఆర్.. ఆ జిల్లా నేతలతో భేటీ

బీఆర్‌ఎస్ అధినేత, మాజీ ముఖ్యమంత్రి కేసీఆర్ మంగళవారం తెలంగాణ భవన్‌కు రానున్నారు. అసెంబ్లీ ఎన్నికల తర్వాత ఆయన తెలంగాణ భవన్కు రానుండటం ఇదే తొలిసారు. కృష్ణా పరివాహక ప్రాంతంలోని జిల్లాల నేతలతో రేపు ఉదయం 11 గంటలకు బీఆర్‌ఎస్ అధినేత సమావేశంకానున్నారు. ఈ క్రమంలో ఉమ్మడి మహబూబ్‌నగర్, ఖమ్మం, నల్గొండ, హైదరాబాద్, రంగారెడ్డి జిల్లాలకు చెందిన ఎమ్మెల్యేలు, ఎమ్మెల్సీలు, ఎంపీలు, ఇతర ముఖ్య నేతలు ఈ సమావేశానికి హాజరుకానున్నారు.

కృష్ణా నదీ పరివాహక ప్రాంతంలోని ఉమ్మడి ప్రాజెక్టులను కృష్ణా రివర్ మేనేజ్మెంట్ బోర్డుకు అప్పగించిన నేపథ్యంలో భవిష్యత్ కార్యచరణపై చర్చించనున్నారు. ఫిబ్రవరి 8 నుంచి అసెంబ్లీ బడ్జెట్ సమావేశాలు ప్రారంభంకానున్న నేపథ్యంలో కేబినెట్ నిర్ణయాలు, సభలో అనుసరించాల్సిన వ్యూహాలపై సలహాలు సూచనలు ఇవ్వనున్నారు.

మరోవైపు అసెంబ్లీ సమావేశాల అనంతరం నల్గొండ జిల్లాలో భారీగా బహిరంగ సభకు బీఆర్ఎస్ ప్లాన్ చేస్తోంది. గులాబీ బాస్ కేసీఆర్ హాజరుకానున్న ఈ సభను లోక్ సభ ఎన్నికల ప్రచార శంఖారావంగా భావిస్తున్నారు. ఈ క్రమంలో సభను గ్రాండ్ సక్సెస్ చేసేందుకు తీసుకోవాల్సిన చర్యలపై గులాబీ నేతలు చర్చించనున్నారు.