MLA Rajasingh : పార్టీకి దూరం..! ఎమ్మెల్యే రాజాసింగ్పై కేసు నమోదు
గోషామహల్ బీజేపీ ఎమ్మెల్యే రాజాసింగ్ పై పోలీసులు కేసు నమోదు చేశారు. వనపర్తి జిల్లా కొత్తకోటలో నిర్వహించిన చత్రపతి శివాజీ విగ్రహావిష్కరణ కార్యక్రమంలో రాజాసింగ్ పాల్గొన్నారు. ఈ కార్యక్రమంలో రాజాసింగ్ వివాదాస్పద వ్యాఖ్యలు చేశారని కొంతమంది కొత్తకోట పోలీస్ స్టేషన్ లో ఫిర్యాదు చేశారు. ముస్లింల మనోభావాలు దెబ్బతినేలా రాజాసింగ్ ప్రసంగించారని.. ఆయనపై చర్యలు తీసుకోవాలని ఫిర్యాదులో తెలిపారు. దీంతో కొత్తకోట పోలీసులు రాజాసింగ్పై కేసు నమోదు చేశారు. ఓ వర్గంపై వివాదాస్పద వ్యాఖ్యలు చేశారని రాజాసింగ్ పై పలుమార్లు కేసులు నమోదయ్యాయి. అలాగే.. చంపేస్తామంటూ రాజాసింగ్ సింగ్ కు బెదిరింపు ఫోన్ కాల్స్ కూడా వస్తుంటాయి.
ప్రస్తుతం రాజాసింగ్ పార్టీ కార్యక్రమాలకు దూరంగా ఉంటూ వస్తున్నారు. మంగళవారం (ఫిబ్రవరి 27)న బీజేపీ అధ్యక్షుడు కిషన్ రెడ్డి గోషామహల్ లో నిర్వహించిన విజయ సంకల్ప రథయాత్రకు కూడా హాజరు కాలేదు. దీంతో రాష్ట్ర నాయకత్వానికి, రాజాసింగ్ కు మధ్య పూడ్చ లేనంత దూరం పెరిగిపోతుందని పార్టీ శ్రేణులు ఆందోళన చెందుతున్నారు. కాగా వరుసగా మూడోసారి ఎమ్మెల్యేగా గెలిచినా.. తనకు పార్టీలో సరైన ప్రాధాన్యం ఇవ్వట్లేదని రాజాసింగ్ వాపోతున్నట్లు తెలుస్తుంది.
